ضلع پونچھ کی تحصیل منڈی میں دوران شب چوری کی واردات کے بعد دوکانداروں میں شدید تشویش کی لہر دوڑ گئی ہے۔
نقب زنی کی واردات کے بعد پولیس موقع پر پہنچی اور ضلع صدر مقام سے ایکسپرٹ ٹیم بھی بلائی گئی جنہوں نے چوروں کا سراغ لگانے کی غرض سے باریک بینی سے دکانوں کا معائینہ کیا، جس دوران انہوں نے کچھ نمونے اپنے ساتھ بھی لے لیے۔
پولیس کی جانب سے کی جانے والے کاررائیوں کو مقامی دکانداروں نے ناکافی قرار دیتے ہوئے پولیس کے تئیں ناراضگی کا اظہار کیا۔
دکانداروں کے مطابق ’’اس سے قبل بھی علاقے میں ہوئی نقب زنی کی واردات میں پولیس ملوث افراد کو پکڑنے میں ناکام رہی ہے۔‘‘
انہوں نے حیرانگی کا اظہار کرتے ہوئے کہا: ’’پولیس رات کو گشت بھی کرتی ہے، تاہم اس کے باوجود نقب زنوں کا شٹر توڑ کر سامان چرانا حیران کن ہے۔‘‘
مقامی دکانداروں نے کہا کہ انہوں نے بینکوں سے سود پر قرضہ لیکر تجارت شروع کی ہے اور اس طرح کی واردات سے وہ مالی مشکلات کے علاوہ ذہنی تنائو کے بھی شکار ہو رہے ہیں۔
