ممبئی: ریاست مہاراشٹر میں بڑے سیاسی ڈرامے کے بعد ریاست کے انتظامی امور ابھی تک ہموار طریقے سے شروع نہیں ہوئے ہیں۔ اس پس منظر میں بات کرتے ہوئے ریاستی صدر جینت پاٹل نے کہا کہ حال ہی میں حلف برداری کی تقریب کے بعد ریاست میں ایک غیر معمولی صورتحال پیدا ہوئی ہے۔
حکومت نے نئے ساتھی لے لیے لیکن حلف برداری کے بعد ابھی تک دفتر اور محکموں کی تقسیم نہیں ہوئی۔ چونکہ بہت سے اضلاع میں سرپرست وزیر نہیں ہیں انتظامیہ ٹھپ ہو کر رہ گئی ہے۔ اس صورتحال پر توجہ دے کر حکومت جلد از جلد کوئی فیصلہ لے اور ریاست کا نظم و نسق شروع کرے۔ جب ان سے یہ سوال پوچھا گیا کہ حکمراں پارٹی کے کئی اراکین اسمبلی اور آزاد اراکین اسمبلی نئے آنے والے ساتھیوں کی وجہ سے پریشان ہیں تو انہوں نے کہا کہ انہیں نہیں معلوم کہ کس نے کیا فیصلہ کیا ہے۔ جو پریشان ہیں وہ سامنے آئیں اور اپنا موقف بیان کریں۔
انہوں نے کہاکہ اگر ظلم ہے تو عوام کے سامنے پیش کریں۔ کانگریس پارٹی کے لیے اپنی اراکین اسمبلی کی تعداد کی بنیاد پر طاقت کی وجہ سے اپوزیشن لیڈر بننا ممکن ہے۔ انہوں نے بتایا کہ جلد ہی ہم اپنی ساتھی پارٹی سے اس پر بات کریں گے اور فیصلہ کریں گے۔
