مہاراشٹر کے شہر پونے کے علاقے وِمان نگر میں پولیس اور خفیہ محکمہ کی جانب سے مشترکہ طور پر کارروائی انجام دی گئی اور اس پاداش میں چھ افراد کو گرفتار کیا گی جس میں سے ایک ملزم فوج میں ملازمت کرتا ہے۔
پولیس کے مطابق شیخ علیم ، سنیل بھدری ناتھ سارڈا، رتیش رتناکر، طفیل احمد، عبدل غنی، عبد الرحمن عبدل غنی کو گرفتار کیا گیا ہے اور ان کے خلاف کارروائی کی جارہی ہے۔
پولیس نے بتایا کہ خفیہ اطلاع کی بنیاد پر یہ کاروائی کی گئی ہے، ومان نگر کے علاقے میں واقع ایک بنگلے میں یہ کام انجام دیا جارہا تھا اور بنگلے میں کوئی داخل نہ ہو اس کے لیے ملزمین نے غیر ملکی نسل کے چار کتے گیٹ پر چھوڑ رکھے تھے۔
پولیس نے بنگلے سے خفیہ کیمرے، دو بندوق، کمپیوٹر، لیپ ٹاپ، پرنٹنگ مشین اور اس کام میں استعمال ہونے والے دیگر ساز وسامان ضبط کیے ہیں۔
اس تعلق سے پونے شہر کے ڈپٹی کمشنر آف پولیس بچن سنگھ نے بتایا کہ جعلی کرنسی جس میں بچوں کے کھیلنے والے نقلی بھی شامل ہیں اور ساتھ ہی فرضی امریکی ڈالر بھی برآمد کیے گئے ہیں جو کل 87 کروڑ کے قریب ہے۔
انھوں نے مزید کہا کہ ملزمین عام لوگوں کے درمیان ان جعلی نوٹوں کو اصلی کرنسی نوٹ بتاکر استعمال کررہے تھے لیکن یہاں چھاپے زیادہ تر نوٹوں کی تعداد بچوں کے کھیلنے والے نوٹ 'چلڈرن بینک آف انڈیا کی ہے'۔
