جموں میں بی جے پی کارکنان نے فاروق عبداللہ کے حالیہ بیان کے خلاف ریلی نکال کر احتجاج کیا ۔ احتجاج کی صدارت سابق وزیر یُدھویر سیٹھی کر رہے تھے۔ اس موقع پر احتجاجیوں نے ڈاکٹر فاروق عبداللہ کا پتلہ نذر آتش کیا۔ مظاہرین نے فاروق عبداللہ کے خلاف جم کر نعرے بازی کی اور ان کے خلاف مقدمہ درج کرنے کا مطالبہ کیا۔
بی جے پی کے سینیئر رہنما اور سابق وزیر یُدھویر سیٹھی نے میڈیا نمائندوں سے بات کرتے ہوئے کہا کہ فاروق عبداللہ نے پارلیمنٹ کے ذریعہ دفعہ 370 منسوخ کرنے پر جو بیان دیا ہے وہ قابل مذمت ہے۔ انہوں نے کہا کہ آئینی طریقہ سے کشمیر کی خصوصی حیثیت کی منسوخی پر سوال اٹھانے والوں کو ملک دشمن قرار دیا جائے اور ان کے خلاف مقدمہ درج کیا جائے۔
یہ بھی پڑھیں: بڈگام میں عسکریت پسندوں کے چار معاونین گرفتار
یُدھویر سیٹھی نے مزید کہا کہ 'سابق وزیراعلیٰ اور رکن پارلیمنٹ اس طرح کا بیان دے کر کیا ثابت کرنا چاہتے ہیں۔ ملک کے مفادات کے خلاف بیانات کو برداشت نہیں کیا جائے گا'۔
بتادیں کہ نیشنل کانفرنس نے بی جے پی کے اس دعوے کو سختی سی مسترد کرتے ہوئے کہا ہے کہ ان کے قائد فاروق عبداللہ نے ایسا کبھی نہیں کہا ہے کہ چین کی مدد سے جموں و کشمیر میں دفعہ 370 کو بحال کیا جائے گا بلکہ ان کے بیان کو غلط طریقے سے پیش کیا گیا ہے۔
