جموں و کشمیر اپنی پارٹی کے ٹریڈ یونین کی طرف سے جموں کے پارٹی صدر دفتر گاندھی نگر میں تقریب کا انعقاد کیا گیا، جس میں جموں کے ضلع صدر انیرودھ شرما کی گلپوشی کرکے حوصلہ افزائی کی گئی۔
اس موقع پر اپنی پارٹی کے جنرل سکریٹری وکرم ملہوترہ نے کہا کہ اپنی پارٹی مرکزی قیادت کے ساتھ 18مارچ 2020 سے ہی ملاقات کر رہی ہے اور ہمارا یہ موقف رہا ہے کہ حکومت ہند سے مذاکرات کی صورت میں ہی جموں و کشمیر کی ترقی ممکن ہے۔
وکرم ملہوترہ نے جموں وکشمیر کے رہنماؤں کو مدعو کرنے پر حکومت ہند کی ستائش کرتے ہوئے کہا کہ یہ خوش آئند قدم ہے کہ تمام مین اسٹریم سیاسی جماعتوں کو مرکزی حکومت کے ساتھ مذاکرات کی اہمیت کا احساس ہوگیا ہے اور اُمید ہے کہ حکومت ہند بھی اس کا مثبت جواب دے گی۔
یہ بھی پڑھیں: ہمارا مسئلہ دہلی سے حل ہوگا: الطاف بخاری
وہیں صوبائی صدر انیرودھ شرما نے مطالبہ کیا کہ کووڈ 19 بحران سے بُری طرح متاثر ہوئے سماج کے کمزور طبقہ جات کو معقول معاوضہ دیا جائے۔ انہوں نے کہا کہ تاجر، چھوٹے دکاندار، ٹرانسپورٹرز، آٹو رکشا، منی بسیں، سبزی وپھل فروش، فاسٹ فوڈ اسٹال اور مختلف قسم کی چھوٹی دکانوں سے کاروبار کرنے والوں کے لیے بہت مشکلات کا سامنا کرنا پڑا ہے اس لیے ان کو مالی پیکیج دیا جائے۔
