اپنوں سے دور، تنہا اور بے یار و مددگار جوزف نامی زخمی و ناتواں شخص جموں کے میڈیکل کالج اسپتال میں انتہائی کسمپرسی کی حالت میں ہے۔
آسام سے تعلق رکھنے والے جوزف کے لیے اسپتال انتظامیہ کی جانب سے مفت علاج اور کھانے پینے کا انتظام کیا جا رہا ہے حتی کہ انہیں ایک مصنوعی ٹانگ بھی لگائی گئی ہے۔
جوزف کے مطابق کٹرا جاتے ہوئے ان کے ساتھ حادثہ پیش آیا جس کے بعد انہیں اسپتال میں داخل کرایا گیا اور وہ گزشتہ تین مہینوں سے اسپتال میں ہے۔
جوزف کے پاس نہ موبائل فون ہے اور نہ ہی اب تک انہوں نے اہل خانہ کو اپنے ساتھ پیش آئے حادثے کی خبر دی ہے۔
ای ٹی وی بھارت کے ساتھ بات کرتے ہوئے جوزف نے کہا کہ اگرچہ ڈاکٹر ان کا مناسب اور بہتر علاج کر رہے ہیں۔ تاہم اسپتال میں ان کا نہ کوئی دوست ہے اور نہ ہی کوئی ہمدرد۔
انہوں نے کہا کہ وہ گھر جانا چاہتے ہیں۔ تاہم اس کے لیے ان کے پاس وسائل موجود نہیں اور ایک ٹانگ کاٹے جانے کے بعد وہ پوری طرح معذور و لاچار ہو گئے ہیں۔
انہوں نے لوگوں سے مالی معاونت کی اپیل کی ہے تاکہ وہ بھی جلد سے جلد اپنے والدین کے پاس جا سکیں۔
