منڈی: منڈی ضلع پونچھ کی تحصیل ہیڈ کوارٹر منڈی سے قریب دس کلومیٹر دور منڈی تا پھاگلہ سڑک پر ایک ٹاٹا موبائیل گاڑی حادثے کا شکار ہوگئی۔ جس کے نتیجہ میں ایک 17 سالہ لڑکے کی موت واقع ہوگئی۔ جس کی شناخت محمد ارشد ساکن ڈنہ دھکڑاں کے طور پر کی گئی ہے۔ عینی شاہد کے مطابق ٹاٹا موبائیل میں چار افراد سوار تھے اور یہ گھاس سے بھری ہوئی ڈھوک کی جانب رواں دواں تھی کہ اچانک پیر متو عطر شاہ صاحب کی زیارت کے قریب گاڑی حادثہ کا شکار ہوگئی۔ جس دوران ڈرائیور اور ایک شخص بھاگ گیا جب کہ ایک شخص کی موت واقع ہوگئی۔ دیگر دو افراد کی جان بال بال بچ گئی۔
لوگوں نے بتایا کہ منڈی تا پھاگلہ سڑک کا کام چل رہا ہے اور سڑک پر پتھر پڑے ہوئے تھے اور ڈرائیور نے لاپرواہی برتے ہوئے گاڑی کو کچی سڑک سے لے جانے کی کوشش کر رہا تھا، جس دوران اچانک کچی زمین کھسک گئی اور گاڑی گہری کھائی میں جا گری اس دردناک حادثہ میں ایک کی موت ہوگئی۔
جسے مقامی لوگوں کی مدد سے سب ضلع اسپتال منڈی پہنچایا گیا۔ جہاں تمام تر لوازمات پورے کرنے کے بعد لاش کو اہل خانہ کے سپرد کیا گیا۔ ڈاکٹروں کے مطابق نوعمر کو مردہ حالت میں اسپتال لایا گیا تھا۔ پوسٹ مارٹم کے بعد لاش کو ورثہ کے حوالے کر دیا گیا ہے۔ اس حوالے سے پولیس کی جانب سے ایف آئی آر درج کر کے مزید تحقیقات شروع کردی گئی ہے۔ وہیں اسی سلسلہ میں ضلع ترقیاتی کمشنر پونچھ کی ہدایات پر مرحوم کے والد کو بطور امداد 25000 روپے فراہم کیے گیے۔
