جموں و کشمیر کے پارلیمانی حلقہ اننت ناگ سے منتخب رکن پارلیمان حسنین مسعودی نے ای ٹی وی بھارت سے خصوصی گفتگو کے دوران بتایا کہ وزیراعظم نریندر مودی سے ملاقات کشمیری عوام کے اندیشوں کے مد نظر کی گئی ہے۔
حسنین مسعودی نے ملاقات کے اغراض و مقاصد پر روشنی ڈالتے ہوئے بتایا کہ حالیہ دنوں میں کشمیر میں فوج کی نقل و حرکت اور اضافی فورسز کی تعیناتی کی وجہ سے کشمیری عوام میں 35 دفعہ اے اور 370 کے تعلق سے کئی اندیشے پیدا ہو گئے تھے، جسے ہم لوگوں نے وزیراعظم نریندررمودی کو آگاہ کیا۔
مسعودی کے مطابق وزیر اعظم نے انھیں یہ یقین دہانی کرائی ہے کہ جو اندیشے پیدا ہوئے ہیں، وہ حقیقت پر مبنی نہیں ہے۔
مسعودی نے کہا کہ وفد نے وزیراعظم کے سامنے جموں و کشمیر میں اسمبلی انتخابات کے انعقاد کا قضیہ بھی رکھا،جس پر وزیر اعظم نے تسلی بخش جواب دیا۔
انہوں نے ملاقات کو اطمینان بخش قراردیا، وفد میں فاروق عبداللہ، عمر عبداللہ اور حسنین مسعودی شامل تھے۔
