آگ لگنے سے دکانوں میں موجود ہر قسم کا ساز وسامان راکھ کے ڈھیر میں تبدیل ہوگیا۔
مقامی لوگوں کے مطابق پیر اور منگل کی درمیانی رات جڈی بل سرینگر کے عالمگیری بازار میں موجود ایک شاپنگ کمپلیکس سے اچانک آگ ظاہر ہوئی جس نے دیکھتے ہی دیکھتے پورے کمپلیکس کو اپنی لپیٹ میں لے لیا۔
اس موقع پر نوجوانوں نے آگ پر قابو پانے کیلئے کارروائی شروع کی۔
اس کے فوراً بعد فائر اینڈ ایمرجنسی سروسز کو مطلع کیا گیا جس کے بعد کئی گھنٹوں کی مسلسل جدوجہد کے بعد آگ پر قابو پا لیا گیا۔ تاہم اس سے پہلے بڑے پیمانے پر تباہی مچ گئی تھی اور کروڑوں روپے کی املاک خاکستر ہو چکی تھی۔
آگ کی اس تباہ کن واردات میں 6 دکانیں مکمل طور پر راکھ کے ڈھیر میں تبدیل ہو گئی اور ان میں موجود ہر قسم کے سامان جل کر خاکستر ہو گئے۔
فائر اینڈ ایمرجنسی سروسز کے مطابق آگ لگنے کی وجہ فوری طور معلوم نہیں ہو سکی ہے۔ انہوں نے کہا کہ آگ بجھانے کے دوران فائر سروس عملے کو سخت ترین مشکلات کا سامنا کرنا پڑا اور تقریبا تین گھنٹے بعد آگ پر قابو پایا گیا۔
انہوں نے بتایا کہ اس معاملے کی نسبت پو لیس نے بھی کیس درج کر لیا ہے۔
