ریاست گجرات کے سورت میں جمعرات کی صبح زہریلی گیس کے رساؤ کا معاملہ پیش آیا ہے۔ سورت کے سچن جی آئی ڈی سی علاقے میں واقع ایک فیکٹری کے قریب کھڑے ایک کیمیکل ٹینکر سے زہریلی گیس نکلنے کی وجہ سے فیکٹری کے پانچ کارکن کے ہلاک ہونے کی خبر موصول ہوئی ہے۔وہیں تقریبا 20 دیگر افراد اس زہریلی گیس میں سانس لینے کی وجہ سے بے ہوش ہوگئے۔ Gas Leak in Surat Gujarat
گیس لیک ہونے سے دیگر 20 لوگوں کی حالت نازک بتائی جارہی ہے۔ تمام لوگوں کو فوری طور پر علاج کے لیے سورت سول اسپتال میں داخل کروایا گیا ہے۔
سورت میونسپل کارپوریشن کے انچارج چیف فائر افسر بسنت پاریک کے مطابق سچن صنعتی علاقے میں واقع ڈائینگ فیکٹری میں مزدور موجود تھے، جب یہ واقعہ پیش آیا۔فائر ڈپارٹمنٹ کو صبح 4.25 بجے کے قریب اس حادثے کی اطلاع ملی۔
انہوں نے بتایا کہ فیکٹری کے قریب سڑک کے کنارے کھڑے کیمیکل ٹینکر سے زہریلی گیس نکلنے کی وجہ سے 25 سے 26 کارکن بے ہوش ہوگئے۔
عہدیدار نے بتایا کہ 'ان سب کو جلدی سے سول اسپتال لے جایا گیا ہے۔ کم از کم پانچ کارکن اب تک اسپتال میں دم توڑ چکے ہیں۔ انہوں نے کہا کہ فائر ڈپارٹمنٹ بعد میں ٹینکر کے ویلو کو بند کرنے میں کامیاب ہوگیا، تاکہ گیس کے رساؤ کو روکا جاسکے'۔
