'مہاجر مزدوروں کو ضروری سہولیات مہیا کرائی جائے'

مرکزی حکومت نے کورونا عالمی وبا کے پیش نظر نافذ مکمل لاک ڈاؤن کے سبب پورے ملک میں مختلف ریلیف کیمپوں اور مراکز میں رہنے والے مہاجر مزدوروں کو ضروری سہولتیں مہیا کروانے کے لیے تمام ریاستوں اور مرکز کے زیر انتظام علاقوں کو دوبارہ ہدایات دی ہیں۔

مرکزی وزارت داخلہ نے تمام ریاستوں اور مرکزکے زیر انتظام علاقوں کے چیف سکریٹریز کو خط لکھ کر کہا ہے کہ انھیں سپریم کورٹ کی ہدایات کے مطابق ریلیف کیمپوں میں رہنے والے مزدوروں کو ہر طرح کی سہولتیں مہیا کروانے کے لیے اقدامات کرنے چاہیے۔ خط میں یہ بھی واضح طور پر کہا گیا ہے کہ اس دوران مکمل بند سے متعلق ہدایات پر سختی سے عمل درآمد ضروری ہے۔

عدالت نے کہا کہ ان کیمپوں میں کھانا، پینے کا پانی، صافی صفائی کے انتظامات کو یقینی بنایا جانا چاہیے۔ تربیت یافتہ صلاح کاروں اور مختلف طبقات کو بھی کیمپوں میں جا کر ان افراد کے مسائل کے بارے میں ان سے بات کرنی چاہیے۔

عدالت نے یہ بھی کہا ہے کہ پولیس دیگر افسران کو مہاجروں کے قلبی جذبات کو سمجھتے ہوئے، ان کے ساتھ ہمدردانہ رویہ اختیار کرنا چاہیے۔ کیمپوں میں فلاح و بہبود کی سرگرمیوں کی نگرانی کے لیے رضا کاروں کو بھی تعینات کیا جانا چاہیے۔