الشفاء ہسپتال کے میڈیکل سپرنٹنڈنٹ ڈاکٹر محمد جاوید نے ای ٹی وی بھارت سے بتایا کہ کورونا کے مریضوں میں اضافے کے ساتھ ہی آکسیجن سلنڈر کی پریشانی بھی صاف نظر آنے لگی۔
اسی کو دیکھتے ہوئے الشفاء ہسپتال کی انتظامیہ نے لکوڈ میڈیکل آکسیجن کے ایک ہزار میٹرک ٹن کے ٹینک لگانے کا فیصلہ کیا ہے۔
انہوں نے کہا کہ کورونا کی دوسری لہر میں آکسیجن کی مانگ میں کئی گنا اضافہ ہوا ہے۔ اس سے نہ صرف ہسپتال پریشان ہیں بلکہ حکومت پر بھی اضافی بوجھ پڑ رہا ہے۔ ایسے میں ہم نے حکومت کے اس بوجھ کو کم کرنے کا فیصلہ کیا ہے۔
مزید پڑھیں:
دہلی میں کورونا مزید سنگین، ایک دن میں سب سے زیادہ اموات
آکسیجن جنریشن پلانٹ کے منصوبے پر آئندہ چار ہفتوں میں کام شروع ہو جائے گا اور 8 ہفتوں میں یہ پلانٹ ہسپتال کو آکسیجن کی سہولت فراہم کرانے کے لیے دستیاب ہوگا۔ ایسے وقت میں جب تمام بڑے ہسپتال حکومت کی مدد کے منتظر ہیں ایسے میں ہیومن ویلفیئر ٹرسٹ کے زیر اہتمام چلنے والے الشفا ہسپتال کا اپنے پیسے سے آکسیجن جنریشن پلانٹ لگانا نہ صرف خود اعتمادی کا ثبوت دیتا ہے بلکہ حکومت پر پڑنے والے بوجھ کو بھی کم کرنے کا کام کرے گا۔
