گلوان وادی پر چینی دعویٰ کو بھارت نے کیا مسترد

نئی دہلی نے واضح کردیا ہے کہ گلوان وادی تاریخی طور پر بھارت کا حصہ ہے اور چین کی جانب سے لائن آف ایکچول کنٹرول کے حوالہ سے جو مبالغہ آرائی اور نافہم دعوے پیش کئے جارہے ہیں وہ ہرگز قابل قبول نہیں ہیں۔

بھارتی وزارت خارجہ نے کہا کہ وادی گلوان پر چین کا دعویٰ ناقال قبول ہے۔ وزارت کے ترجمان انوراگ شریواستو نے کہا کہ گلوان وادی بھارت کا حصہ ہے جو ایک تاریخی حقیقت ہے۔ انہوں نے کہا کہ اس پر کسی بھی طرح کا دعویٰ ناقابل قبول ہے۔

انوراگ شریواستو نے گلوان پر چین کی مبالغہ آرائی اور دعوؤں پر سخت تنقید کرتے ہوئے کہا کہ وادی پر بھارت کا موقف تاریخی طور پر واضح ہے۔

انہوں نے چین کی جانب سے پورے گلوان علاقہ پر دعوے کو مسترد کرتے ہوئے کہا کہ یہ ناقابل فہم ہے اور ماضی میں چینی موقف کی بھی نفی کرتا ہے۔

واضح رہے کہ قبل ازیں چینی وزارت خارجہ کے ترجمان ژاؤ لیجیان نے کہا تھا کہ ’گلوان وادی ایل اے سی کے ساتھ چینی علاقے کے اندر واقع ہے اور پوری وادی چینی علاقہ ہے‘۔

گلوان وادی میں گذشتہ پیر کی رات بھارت۔چین افواج میں ہوئے پُرتشدد تصادم میں بھارتی کرنل سمیت 20 فوجی شہید ہوئے تھے اور گزشتہ پانچ دہائیوں میں دونوں ملکوں کی فوجوں کے درمیان اب تک کایہ سب سے بڑا فوجی ٹکراﺅ تھا۔ اطلاعات کے مطابق اس خونریز جھڑپ میں بڑی تعداد میں چینی فوجی بھی ہلاک ہوئے ہیں۔