بھارت میں کوویڈ ویکسین کے پہلے مرحلہ کے تحت وبا کے خلاف لڑنے والے صف اوّل کے ایک کروڑ صحت کارکنوں اور دیگر دو کروڑ پہلی صف کے ورکرز کو مفت ٹیکہ لگایا جائے گا۔ کوویڈ ویکسین کے پہلے مرحلہ میں ملک بھر میں سب سے زیادہ ترجیح وبا کے خلاف جنگ میں صف اول میں شامل افراد کو دی جارہی ہے جبکہ ایسے تین کروڑ کارکنوں کو ٹیکہ لگایا جائے گا۔ وزیر صحت ہرش وردھن نے آج ٹوئٹ کرکے بتایا کہ ’ ملک میں آئندہ جولائی تک مزید 27 کروڑ لوگوں کو ترجیحی بنیاد پر ویکسین دی جائے گی‘۔
ملک بھر میں آج کوویڈ۔19 ٹیکہ اندازی کےلیے ڈرائی رن یا ریہرسل کا آغاز کیا گیا جس کا مقصد ویکسی نیشن مہم سے وابستہ مسائل کی نشاندہی کرکے انہیں دور کرنا ہے جس کے لیے آج ملک بھر کے 116 اضلاع میں 259 مقامات پر ’ڈرائی رن‘ کا آغاز کیا گیا۔ مرکزی صحت اور خاندانی بہبود کی وزارت کے مطابق ’ڈرائی رن‘ کے دوران ویکسی نیشن مہم سے متعلق تمام طریقہ کار پر عمل کیا جائے گا جیسے حقیقی ویکسی نیشن مہم کے دوران طریقہ کار اپنایا جائے گا۔
واضح رہے کہ بھارت کے سیرم انسٹی ٹیوٹ آف انڈیا کی جانب آکسفورڈ کوویڈ۔19 ویکسین تیار کیا جارہے جبکہ ڈرگس کنٹرولر جنرل آف انڈیا کی جانب سے اسے منظوری دی گئی ہے۔ سیرم انسٹی ٹیوٹ آف آکسفورڈ یونیورسٹی اور دوا ساز کمپنی آسٹرازینکا کی جانب سے مشترکہ طور پر ویکسین کی بھارت میں تیاری کی جارہی ہے وہیں بھارت بائیوٹیک، آئی سی ایم آر کے تعاون سے کوویکسین کی تیاری میں مصروف ہے۔
