سڑک حادثے میں دو نوجوان ہلاک، ایک شدید زخمی

شمالی کشمیر کے قصبہ سوپور میں دلدوز سڑک حادثے میں دو نوجوان فوت ہو گئے جبکہ تیسرا شدید زخمی ہو گیا۔

ضلع بارہمولہ کے بوٹنگو، سوپور میں جمعرات کی شام ایک موٹر سائیکل ڈرائیور کے قابو سے باہر ہوکر گاڑی سے ٹکرا گئی جس پر سوار تین نوجوان شدید زخمی ہو گئے۔

زخمی نوجوانوں کو فوری طور سب ضلع اسپتال سوپور پہنچایا گیا جہاں ایک نوجوان زخموں کی تاب نہ لا کر فوت ہو گیا۔ جبکہ بقیہ دو نوجوانوں کو نازک حالت میں سرینگر کے ایس ایم ایچ ایس اسپتال ریفر کر دیا گیا۔

زخمی نوجوانوں میں ایک اور نوجوان نے سرینگر کے ایس ایم ایچ ایس اسپتال میں دم توڑ دیا جبکہ تیسرے نوجوان کی حالت نازک بنی ہوئی ہے۔

پولیس نے اس ضمن میں معاملہ درج کر کے مزید تحقیقات شروع کر دی ہے۔