بانڈی پورہ - گریز سڑک بند رہنے سے عوام پریشان

برف باری کی وجہ سے بانڈی پورہ اور گریز کو جوڑنے والی سڑک گزشتہ 5 ماہ سے بند ہے جس کی وجہ سے لوگوں کو کافی مشکلات کا سامنا ہے۔

شمالی کشمیر کے ضلع بانڈی پورہ کے سرحدی علاقہ گریز برف باری کی وجہ سے 5 ماہ سے زیادہ عرصے تک زمینی رابطے سے منقطع ہو جاتا ہے۔

بانڈی پورہ - گریز سڑک سے برف ہٹانے کا کام گرچہ بیکن نے چار روز قبل مکمل کیا ہے تاہم اس سڑک کو ابھی گاڑیوں کی آمدورفت کے لیے نہیں کھولا گیا ہے۔

دوسری جانب کئی ماہ سے بانڈی پورہ گریز سڑک بند رہنے کی وجہ سے گریز اور تُلیل میں غذائی اجناس کی قلت پیدا ہوگئی ہے۔ لوگوں نے انتظامیہ سے مطالبہ کیا ہے کہ بانڈی پورہ گریز سڈک کو مزید تاخیر کیے بغیر ٹریفک کے لیے کھول دیا جائے۔