شمالی کشمیر کے ضلع بانڈی پورہ میں لاک ڈاؤن میں نرمی دیے جانے کے بعد ڈی سی بانڈی پورہ نے بازاروں کا معائنہ کرکے لوگوں سے احتیاطی تدابیر پر عمل کرنے کی تلقین کی۔
ضلع ترقیاتی کمشنر بانڈی پورہ ڈاکٹر اویس احمد نے کہا کہ ’’لاک ڈاؤن میں نرمی دیے جانے کا ہرگز یہ مطلب نہیں ہے کہ کووڈ کے ضابطہ اخلاق کو فراموش کیا جائے۔‘‘
انہوں نے ڈی سی آفس میں پریس بریفنگ کے دوران ضلع میں کورونا کی صورتحال سے متعلق معلومات فراہم کرتے ہوئے کہا کہ ’’ضلع میں مثبت کیسز کی تعداد میں لگاتار کمی دیکھنے کو مل رہی ہے، تاہم عوام سے احتیاطی تدابیر پر عمل کرنے کی بھی تلقین کی جا رہی ہے۔‘‘
انہوں نے کہا کہ ضلع میں اس وقت فعال کیسز کی تعداد 804ہے جبکہ کووڈ کیئر مراکز میں 10افراد طبی نگہداشت میں ہیں۔
پنچایتوں میں قائم کیے گئے کووڈ مراکز کے حوالے سے ڈی سی بانڈی پورہ نے کہا کہ ان میں سے 40 فیصد مراکز میں آکسیجن کی سہولیات بہم رکھی گئی ہیں جبکہ مراکز میں بھی جلد ہی آکسیجن کی فراہمی کو یقینی بنایا جائے گا۔
