محکمہ یوتھ سروسز اینڈ اسپورٹس نے نہرو یووا مرکز (این وائی کے) اننت ناگ کے تعاون سے اسپورٹس اسٹیڈیم اننت ناگ میں بڑی تقریب کا انعقاد کیا، جہاں طلباء، رضاکاروں اور سرکاری عہدیداروں نے کووڈ ایس او پیز پر سختی سے عمل درآمد کے دوران یوگا میں حصہ لیا۔
ایڈیشنل ڈپٹی کمشنر غلام حسن شیخ نے بطور مہمان خصوصی تقریب کی صدارت کی۔ اس موقع پر اے ڈی سی نے خطاب کرتے ہوئے کہا کہ یوگا کرنے سے جسم اور دماغ پر خاص اثرات مرتب ہوتے ہیں اور ہزاروں برسوں کے عرصے میں اس کے مثبت اثرات سے ثابت ہوا ہے کہ یہ انسان کے جسم اور دماغ کی نشو ونما کے لئے کافی سود مند ہے۔
انہوں نے لوگوں کو مشورہ دیا کہ وہ روزانہ کی بنیاد پر یوگا کی مشق کریں اور اسے اپنے طرز زندگی کا ایک حصہ بنائیں۔
ڈسٹرکٹ یوتھ سروسز اینڈ اسپورٹس افسر مشتاق احمد نے بھی یوگا سے حاصل ہونے والے فوائد کے بارے میں آگاہ کیا۔ انہوں نے بتایا کہ اس دن کو ضلع کے تمام سولہ (16) بلاکس میں ورچوئل اور آف لائن دونوں طریقوں سے منایا جارہا ہے۔
اس تقریب میں ڈسٹرکٹ یوتھ کوآرڈینیٹر خلیل احمد میر، زونل فزیکل ایجوکیشن آفیسر بشیر احمد، مختلف تعلیمی اداروں کے طلباء، رضاکاروں اور متعلقہ محکموں کے فیلڈ افسران نے بھی شرکت کی۔
