بھارت کے شمالی علاقے لداخ خطے کے مقامی باشندوں نے اس خدشے کا اظہار کیا ہے کہ بھارت چین کے مابین سرحدی تنازع کے دوران لیہ قصبے میں لوگوں کو معاشی طور پر بڑا خطرہ ہو سکتا ہے۔
بھارت اور چین نے ایک دوسرے پر اشتعال انگیز چال چلنے اور معاہدوں کی خلاف ورزی کا الزام عائد کیا ہے۔ حالانکہ وہ بڑھتے ہوئے فوجی تناؤ کو ختم کرنے کے لئے بات چیت میں مشغول ہیں۔
اس خطے کے ایک ٹیکسی ڈرائیور نے بتایا کہ وہ کورونا وائرس اور سرحدی کشیدگی کے سبب معاشی چیلنجز کا سامنا کر رہے ہیں۔
مقامی گاؤں کے مکھیا مرزا حسین نے کہا کہ 'ہم امید کرتے ہیں کہ اس صورتحال کو جلد از جلد حل کرلیا جائے کیونکہ دوسری صورت میں عوام انتہائی خوفزدہ ہے'۔
جوہری ہتھیاروں سے لیس بھارت اور چین کے درمیان، مئی ماہ سے ہی کشیدگی کا ماحول ہے۔ ایسے میں اگر جنگ کی نوبت آتی ہے، تو لیہ اور لداخ کے مقامی باشندوں کو سب سے زیادہ مشکلات کا سامنا کرنا پڑ سکتا ہے۔
