بارہمولہ سے تین عسکریت پسند گرفتار، پٹن میں فوجی کیمپ کو نشانہ بنایا تھا

بارہمولہ میں گرفتار تین عسکریت پسندوں نے حال ہی میں پٹن کے علاقے میں ایک فوجی کیمپ کو نشانہ بنایا تھا۔

بارہمولہ: جموں و کشمیر کے بارہمولہ میں ہفتہ کو سیکورٹی فورسز نے تین عسکریت پسندوں کو گرفتار کیا۔ سیکورٹی فورسز نے ان کے قبضے سے بھاری مقدار میں اسلحہ اور گولہ بارود بھی برآمد کیا۔ یہ گرفتاری عسکریت پسندی کے خلاف چلائی جارہی مہم کا حصہ ہے، جس میں سیکورٹی فورسز نے عسکریت پسندوں کے نیٹ ورک کو ختم کرنے کی کوشش کی ہے۔

ایس پی آپریشنز بارہمولہ فیروز یحییٰ کے مطابق بارہمولہ میں 163 ٹی اے کے احاطے میں دستی بم حملے میں ملوث تین عسکریت پسندوں سے ایک ہینڈ گرنیڈ، ایک اے کے سیریز کی رائفل، ایک پستول، 250 زندہ اے کے راؤنڈ اور 21 زندہ پستول کے راؤنڈ برآمد ہوئے ہیں۔

اس واقعے کے حوالے سے پولیس نے پریس کانفرنس میں بتایا کہ گرفتار کیے گئے تینوں عسکریت پسندوں کی کارروائیوں میں سرگرم تھے۔ حال ہی میں انہوں نے پٹن کے علاقے میں ایک فوجی کیمپ کو نشانہ بنایا تھا۔ اس حملے کے بعد پولیس نے ایف آئی آر درج کرکے تفتیش شروع کردی جس کے بعد وہ ان عسکریت پسندوں کو گرفتار کرنے میں کامیاب ہوگئی۔ تحقیقات کے دوران پتہ چلا کہ یہ تینوں عسکریت پسند آرمی کیمپ پر حملے میں ملوث تھے۔

بارہمولہ کے ایس پی فیروز یحییٰ نے کہا، "7 جنوری 2025 کو پٹن میں ایک واقعہ پیش آیا۔ عسکریت پسندانہ کارروائیوں کو انجام دینے کے ارادے سے نامعلوم عسکریت پسندوں نے 163 ٹی اے کی طرف ایک گرینیڈ پھینکا جو سیکورٹی فورس کے کیمپ ہے۔" انہوں نے کہا کہ، مجرموں کو 24 گھنٹوں کے اندر گرفتار کر لیا گیا ہے۔

ان کا کہنا تھا کہ گرفتار افراد میں سے ایک ہتھیار ڈال کر رہا ہونے والا عسکریت پسند ہے، دوسرا ہتھیار ڈالنے والے رہا ہونے والے عسکریت پسندکا بیٹا ہے۔ تیسرا شخص پہلی نظر میں ماسٹر مائنڈ ہے جو پچھلے دو سالوں سے منشیات کے کیس میں گرفتاری سے بچ رہا تھا۔