دوا ساز کمپنی فائزر اور بایو این ٹیک نے کہا ہے کہ وہ 100 دنوں کے اندر کورونا وائرس کے نئے ویریئنٹ اومیکرون Omicron Variant سے بچاو کے لیے ایک نئی ویکسین تیار کرلیں گے۔
دونوں کمپنیوں نے جمعہ کو جاری ایک بیان میں کہا کہ انہیں اس بات کا یقین نہیں ہے کہ آیا ان کی ویکسین کورونا وائرس کے ویریئنٹ اومیکرون Omicron سے بچانے کی صلاحیت رکھتی ہے یا نہیں، لیکن وہ تقریباً 100 دنوں میں اس ویریئنٹ کے خلاف ایک نئی ویکسین تیار کر لیں گی۔
اس سے ایک دن قبل عالمی ادارہ صحت ( ڈبلیو ایچ او) نے اپنے ایک بیان میں کہا تھا کہ جنوبی افریقہ میں شناخت شدہ کورونا وائرس کی نئی قسم ’B.1.1529 ‘ تشویشناک ہے اور اس کا نام یونانی حروف تہجی میں اومیکرون سے رکھا گیا ہے۔
یہ بھی پڑھیں: فائزر کی تیار کردہ کووڈ کی نئی گولی 90 فیصد مؤثر
عالمی ادارہ صحت کے بیان کے مطابق فائزر اور بایو این ٹیک نے کہا کہ وہ اگلے دو ہفتوں میں اومیکرون پر مزید ڈیٹا کی توقع رکھتے ہیں اور ایسا دیکھا گیا ہے کہ یہ پہلے سے پائے جانے والے مختلف ویرینٹس سے کافی الگ ہے۔
بیان میں کہا گیا ہے کہ دوا ساز کمپنیوں نے اس بات کی نشاندہی کی ہے کہ انہوں نے نئی ویکسین تیار کرنے کے لیے کئی مہینے پہلے ہی کام شروع کردیا تھا۔
انہوں نے کہا کہ ان کی ویکسین فی الحال چھ ہفتوں کے اندر خود کو ایڈجسٹ کرنے کے قابل ہے اور وہ 100 دنوں کے اندر ابتدائی بیج تیار کرنے کے قابل ہے۔
(یو این آئی)
