بی جے پی کی مغربی بنگال یونٹ نے ٹی ایم سی پر شکلا کے قتل کا الزام عائد کیا ہے اور اس معاملے کی سی بی آئی تحقیقات کا مطالبہ کیا ہے۔
جگدیپ دھنکر نے "بدترین امن و امان کی صورتحال" کے نتیجے میں مغربی بنگال کے ایڈیشنل چیف سکریٹری (ہوم) اور ڈی جی پی کو آج (پیر کے روز) طلب کیا ہے جس کے نتیجے میں ٹیٹا گڑھ میں کونسلر منیش شکلا کی ہلاکت ہوئی ہے۔
بی جے پی کی ریاستی یونٹ نے ایک ٹویٹ میں کہا کہ 'بنگال کو اب اس جگہ میں تبدیل کیا جا رہا ہے جہاں قتل عام ہو جاتے ہیں۔ ٹیٹا گڑھ کے بی جے پی کونسلر منیش شکلا کو ٹی ایم سی کے غنڈوں نے گولی ماری تھی۔ قتل کا یہ سلسلہ واضح طور پر آپ (ٹی ایم سی) کے ناگزیر خاتمہ کی طرف اشارہ کرتا ہے۔'
مغربی بنگال کے لیے بی جے پی کے سینٹرل آبزرور کیلاش وجئے ورگیہ نے مرکزی تحقیقاتی ایجنسی (سی بی آئی) سے اس معاملے کی جانچ کرانے کا مطالبہ کیا ہے۔
وجئے ورگیہ نے ایک ٹویٹ میں کہا کہ 'بی جے پی کارکن منیش شکلا کو ٹیٹا گڑھ پولیس اسٹیشن کے سامنے (شمالی 24 پرگنہ ضلع میں) گولی مار کر ہلاک کر دیا گیا۔ اس معاملے کی تفتیش سی بی آئی کو کرنی چاہئے۔'
واضح رہے کہ نامعلوم موٹر سائیکل سوار نے مغربی بنگال کے شمالی 24 پرگنہ کے ٹیٹا گڑھ میں بھارتیہ جنتاپارٹی کے رہنما منیش شکلا کو اتوار کے روز گولی مار کر ہلاک کر دیا۔
شکلا بیرک پور سے بی جے پی کے رکن پارلیمنٹ ارجن سنگھ کے قریبی بتائے جاتے ہیں۔
سنگھ نے بھی برسراقتدار ترنمول کانگریس پر بی جے پی لیڈر کو گولی مارنے کا الزام لگایا ہے۔ پارٹی لیڈروں نے اس کے خلاف بی ٹی روڈ پر مظاہرہ کیا۔
