مرکز کے زیر انتظام خطہ لداخ میں عالمی وبا کورونا وائرس کے 4نئے مثبت معاملوں کی تصدیق کے ساتھ ہی خطہ میں کورونا متاثرین کی تعداد بڑھ کر 1005ہو گئی ہے۔
ڈائریکٹوریٹ آف ہیلتھ سروسز یو ٹی لداخ کی جانب سے جاری کردہ میڈیا بلیٹن کے مطابق عالمی وبا کورونا وائرس کے 04 مزید مثبت معاملے سامنے آئے ہیں جن میں ایک ضلع لیہہ جبکہ بقیہ تین ضلع کرگل سے ہیں۔
بلیٹن کے مطابق خطہ لداخ میں مزید 49 کورونا سے متاثرہ افراد صحت یاب ہو گئے ہیں۔ خطہ میں کورونا وائرس کے فعال کیسز کی تعداد 178 ہے جن میں ضلع لیہہ میں 87 اور کرگل ضلع میں 91 ہیں۔ بلیٹن کے مطابق تمام فعال کیسز کی حالت مستحکم ہے۔
واضح رہے کہ لداخ میں عالمی وبا کورونا وائرس سے کُل 1005 افراد متاثر ہوئے ہیں۔ جن میں سے 826 صحت یاب ہو چکے ہیں اور 178 دیگر زیر علاج ہیں۔ جبکہ کورونا وائرس سے متاثرہ ایک مریض کی موت واقع ہوئی ہے۔
