مرہامہ میں سڑک خستہ حال ، مقامی لوگ پریشان

ضلع اننت ناگ کے مرہامہ علاقہ میں سڑک کی خستہ حالی سے علاقہ کی کثیر آبادی کو مشکلات کا سامنا ہے۔ سڑک سے گذرنا کافی مشکل ہے کیونکہ یہاں پانی اور کیچڑ ہمیشہ جمع رہتا ہے۔

علاقہ کے لوگوں کا کہنا ہے کہ گزشتہ تیس برس قبل ناشری نام سے ایک لنک روڈ تعمیر کی گئی تھی لیکن اس سڑک کو اتنا وقت گذرنے کے بعد بھی پختہ نہیں کیا گیا۔ ان تیس برسوں کے دوران نہ ہی سڑک کی مرمت کی گئی نہ ہی میگڈم بچھایا گیا۔

ان کا کہنا ہے کہ مذکورہ لنک روڈ خاص کر میوہ باغات میں جانے کے لئے استعمال کی جاتی ہے تاہم خستہ حالی کے سبب لوگوں کو سڑک سے گذرنے میں کافی دشواری ہوتی ہے۔سڑک پر بڑے بڑے گڑھے بن گئے ہیں۔بارش کے دوران مذکورہ سڑک پر چلنا پھرنا مشکل ہو جاتا ہے۔ مذکورہ سڑک پر چلنے کے دوران گاڑیاں بھی خراب ہوجاتی ہیں۔

مقامی لوگوں کا کہنا ہے کہ موجودہ وقت میں سڑکوں کا کام شد و مد سے جاری ہے تاہم مذکورہ سڑک کو نامعلوم وجوہات کی بنا پر نظر انداز کیا گیا ہے۔ انہوں نے انتظامیہ سے سڑک کی تجدید و مرمت اور اسے میگڈامائز کرنے کا مطالبہ کیا۔