اللہ تعالیٰ کی دی گئی نعمتوں میں سے رمضان المبارک کو ایک منفرد حیثیت حاصل ہے۔ ہر انسان کو ماہ رمضان کا انتظار رہتا ہے اور ہر مسلم ماہ رمضان کا بڑے ہی شوق سے استقبال کرتا ہے۔ رواں برس ماہ رمضان کا پہلا عشرہ یعنی عشرۂ رحمت اختتام پذیر ہو چکا ہے اور دوسرا عشرہ یعنی عشرۂ مغفرت کا آغاز ہو چکا ہے۔
ایسے میں کیا ہے دوسرے عشرے کی اہمیت و فضیلت؟ اس پر احمدآباد کی شاہی جامع مسجد کے شاہی امام مفتی شبیر عالم صدیقی نے کہا کہ 'رمضان المبارک کا ہر عشرہ افضل و اعلیٰ ہے۔ رمضان المبارک کا پہلا عشرہ رحمت کا ہے۔ دوسرا عشرہ مغفرت کا ہے۔ اس درمیان کے دس دن یعنی مغفرت کے عشرے میں اللہ تبارک و تعالی اس دوران بڑے بڑے گناہوں کو معاف کرتا ہے۔ اگر وہ شخص دل سے معافی مانگے تو اللہ تعالیٰ اس کے گناہ معاف کر دیتا ہے۔ آخری عشرہ جہنم سے نجات کا ہوتا ہے یعنی جہنم سے اپنے آپ کو بچانے کا آخری موقع دیا جاتا ہے۔'
یہ بھی پڑھیں: احمد آباد: شب برات کے موقع پر سرکاری گائیڈ لائن پر عمل کرنے کی اپیل
دوسرے عشرے میں بندوں کو خوب عبادت کرنا چاہے کیونکہ اللہ تعالی اپنے بندوں کی عبادت و محبت و اخلاص کو دیکھ کر ان کے گناہوں کی بخشش فرماتا ہے۔ ایسے میں ہمیں چاہیے کہ غریب، مفلس، پریشان حال، ضرورت مند، بیمار، لاچار بندوں کی ہر ممکن مدد کریں تاکہ اللہ تعالی ان کی دعائیں سن کر بندے کے گناہ معاف کر دے۔
