رانا مختار کی کہانی جتنی دلچسپ ہے اتنی ہی سبق آموز بھی ہے۔ سنہ 1947 میں رانا مختار کے آبا و اجداد بریلی کے پڑوسی ضلع بدایوں سےنقل مکانی کر کے کراچی چلے گئے تھے۔ رانا مختار کے والد محمد مختار کراچی کے بڑے تاجروں میں شمار کئے جاتے تھے۔
رانا مختار کے شوہر نے انہیں بھارتی شہریت دلانے کے لیے دن رات دوڑ دھوپ کی۔ لیکن افسوس جب رانا مختار کو ضلع کلکٹریٹ میں بھارتی شہری ہونے کی سند دی جا رہی تھی، تو اُن کے شوہر سید قمر علی اِس یادگار لمحے کے وقت موجود نہیں تھے، دو سال قبل اُنکا انتقال ہو چکا تھا۔
رانا مختار کے پاس دو بچے ہیں بیٹی دہلی میں گوگل کے دفتر میں ملازمت کر رہی ہے تو بیٹا سعودی عرب میں اکاؤنٹنٹ ہے۔
کم و بیش یہی صورت حال شہر کے چھیپی ٹولہ کی رہنے والی شہلا کا بھی ہے۔ اُنکا نکاح سنہ 1990 میں پھل کاروباری رئیس احمد سے ہوا تھا۔ رئیس احمد نکاح کرنے کے لئے کراچی گئے تھے۔ ایک مہینے پاکستان میں رہنے کے بعد وہ اپنی اہلیہ شہلا کو لیکر بریلی آ گئے۔شہلا کے چار بچے ہیں ۔
اہم بات یہ ہے کہ دونوں خواتین تین دہائی کے طویل عرصے میں صرف دو مرتبہ پاکستان گئی ہیں۔ اس درمیان انہوں نے اپنے والد، والدہ اور تمام رشتہ داروں کو کھو دیا۔ جب کبھی خوشی یا غم کا موقع آیا، گھر کے کسی کونے میں چُھپ کر آنسو بہا لیئے۔ سرحدوں کے درمیان دیوار نے اُس پار جانے کا موقع نہیں دیا، صرف موبائل کے دوسری طرف کی آواز نے سرحد پار اپنوں کے ہونے کا احساس کرایا۔
قوانین کے مطابق بھارتی شہریت حاصل کرنے کے لیے اپنے آبائی مُلک کی شہریت کا شناختی کارڈ ہونا ضروری ہوتا ہے۔ لہذا بھارتی ہونے سے قبل اُنہیں خود کو پاکستانی ثابت کرنے کے لیئے مقامی سرٹیفکیٹ بنوانے ایک مرتبہ پاکستان جانا پڑا۔
شہلا سنہ 2006 میں اور رانا مختار سنہ 2007 میں پاکستان گئی تھیں۔ تین دہائی میں بس یہی ایک موقع تھا جب دونوں کو علیحدہ علیحدہ پاکستان جانے کا موقع ملا، اسی درمیان وہ اپنوں سے آخری مرتبہ ملی تھیں۔
بھارتی شہریت حاصل کرنے کے لیے دونوں خواتین نے تین دہائی تک تمام مشکلات کا سامنا کرتے ہوئے سینکڑوں مرتبہ سرکاری دفاتر کے چکّر لگائے اور سرکاری افسران کی منتیں اور خوشامد کی۔ تین دہائی کی بھاگ دوڑ کے بعد بریلی ضلع انتظامیہ نے 24 جون کو دونوں خواتین کو ضلع کلکٹریٹ مدعو کرکے بھارتی شہری ہونے کی سند سپرد کی۔
رانا مختار اور شہلا کو اپنا پین کارڈ، راشن کارڈ اور آدھار کارڈ بھی بنوا سکتی ہیں۔ اس کے ساتھ ہی اُنہیں بینک میں اپنا اکاؤنٹ کھلوانے کی اجازت بھی مل گئی ہے۔ بھارتی شہریت حاصل ہونے کے بعد اب انہیں اپنا نمائندہ منتخب کرنے یعنی ووٹ ڈالنے کا اختیار حاصل ہو جائیگا۔
