معروف انگریزی میگزین انڈیا ٹوڈے نے یونیورسٹی تعلیمی اداروں کی سالانہ رینکنگ میں اے ایم یو کو ملک کی تیسری سب سے عمدہ یونیورسٹی قرار دیا ہے۔
حال ہی میں مشہور بین الاقوامی ایجنسی کیو۔ایس۔ورلڈ نے دنیا بھر کی ایک ہزار ممتاز یونیورسٹیز کی عالمی درجہ بندی جاری کی تھی جس میں اے ایم یو کا نام بھی شامل تھا۔ وہیں یوایس نیوز اینڈ ورلڈ رپورٹ کی میگزین نے بھارتی یونیورسٹیوں کی جو درجہ بندی جاری کی ہے اس میں بھی علیگڑھ مسلم یونیورسٹی کو دوسرا مقام حاصل رہا۔
اے ایم یو کے قیام کے 100 برس مکمل ہو رہے ہیں ایسے موقعے پر یونیورسٹی ملک میں اعلی تعلیمی اداروں میں امتیازی حیثیت حاصل کرنے کی طرف رواں دواں ہیں۔ انڈیا ٹوڈے نے ایم یو کو دو ہزار میں سے مجموعی اسکور 1694.5 پوائنٹ کے ساتھ ملک بھر میں تیسری پوزیشن دی ہے۔
اے ایم یو کو پرسپیشن اسکور میں ایک ہزار میں سے 969.9 پوائنٹ دیے گئے ہیں جو اسے یونیورسٹی آف حیدرآباد سے بھی فائق کر دیتی ہے۔
خیال رہے کہ یونیورسٹی آف حیدرآباد, مذکورہ رینکنگ میں دوسرے مقام پر ہے۔ تاہم انٹیک کوالٹی اور گورننس میں ایم یو نے 167.5 کا اسکور حاصل کر کے یونیورسٹی آف حیدرآباد کو پیچھے چھوڑ دیا ہے۔
گزشتہ تین برسوں میں سب سے زیادہ پوائنٹ حاصل کرنے کے معاملے میں بھی انڈیا ٹوڈے نے اے ایم یو کو تیسری پوزیشن دی ہے جبکہ سب سے زیادہ پوسٹ گریجویٹ کورسیز کی تدریس کے معاملے میں اے ایم یو دوسرے مقام پر فائز ہے یہاں 78 پوسٹ گریجویٹ کورسیز کی تدریس ہو رہی ہے۔
قابل ذکر ہے کہ انڈیا ٹوڈے نے ہندوستان کی ممتاز یونیورسٹیز کی اپنی سالانہ رینکنگ میں 900 سے زیادہ یونیورسٹی اور قومی اہمیت کے حامل تقریبا ایک سو پچیس اداروں کو شامل کیا ہے جس میں جواہر لال نہرو یونیورسٹی پہلے مقام پر، یونیورسٹی آف حیدرآباد دوسرے مقام پر اور علیگڑھ مسلم ینورسٹی تیسرے مقام پر ہے۔
اے ایم یو کے شیخ الجامعہ پروفیسر طارق منصور نے اس شاندار حصولیابی پر یونیورسٹی کے اساتذہ، ریسرچ اسکالرز اور طلبہ طالبات کو مبارکباد پیش کی ہے اور ان سے معیاری اعلی تعلیم کے لیے اپنی کوشش جاری رکھنے کی اپیل کی ہے انہوں نے اساتذہ اور طلبہ پر زور دیا ہے ہے کہ وہ علمی امتیاز کے نئے افق اور تحقیق کے ابھرتے ہوئے میدانوں کی تلاش کریں۔
