مغربی بنگال کے جنوبی 24 پرگنہ کے جادھوپور علاقے میں سی پی آئی ایم کے سینیئر رہنما سوجن چکرورتی کی قیادت میں کسانوں کی حمایت میں احتجاجی ریلی نکالی گئی۔
سی پی آئی ایم کے سینیئر رہنما سوجن چکرورتی کی قیادت میں سی پی آئی ایم کے سینکڑوں حامیوں نے جادھوپور ریلوے اسٹیشن کے سامنے احتجاج کیا۔
بھارت بند احتجاج کے دوران سی پی ایم کے کارکنان نے ریلوے ٹریک پر دھاوا بول دیا اور ریلوے پٹری پر ہی دھرنے پر بیٹھ گئے۔
احتجاج کے دوران شہر کے جنوبی علاقہ میں لوکل ٹرین خدمات 45 منٹوں تک پوری طرح سے ٹھپ رہی جس کے سبب چند مسافروں نے ناراضگی کا اظہار کیا جبکہ دیگر مسافروں کی کثیر تعداد نے بھارت بند کی کھل کر حمایت کی۔
اسمبلی میں بائیں محاذ کے رہنما سوجن چکرورتی نے وزیراعظم نریندر مودی کے پتلے کو نذرآتش کرتے ہوئے کسان بل کو واپس لینے کا مطالبہ کیا۔ سی پی آئی ایم کے رہنما سوجن چکرورتی نے کہا کہ کسانوں کی حمایت ہر حال میں اور کسی بھی قیمت پر لازمی ہے۔
انہوں نے مزید کہا کہ کسانوں کی یہ تحریک راست طور پر عام بھارتیوں سے منسلک ہے۔ اگر کوئی یہ سوچ رہا ہے کہ انہیں اس سے نقصان نہیں ہونے والا تو اس کا مطلب یہ ہوا کہ وہ بی جے پی کی حمایت کررہا ہے۔
سوجن چکرورتی کے مطابق مغربی بنگال ملک کی واحد ایسی ریاست ہے جہاں بی جے پی کی قیادت والی مرکزی حکومت کی ہر پالیسی پر سب سے زیادہ مخالفت کی جاتی ہے۔
