گوہاٹی: فیفا ورلڈ کپ 2026 اے ایف سی کوالیفائر میچ میں سنیل چھتری کے اسٹرائیک کے باوجود ہندوستان کو گھریلو میدان پر افغانستان سے شکست کا سامنا کرنا پڑا ہے۔بین الاقوامی فٹبال میچ میں افغانستان کے ہاتھوں ہندوستان کی شکست کو اپ سیٹ قرار دیا گیا۔
منگل کی رات کو گوہاٹی کے اندرا گاندھی ایتھلیٹک اسٹیڈیم میں کھیلے گئے فیفا ورلڈ کپ 2026 اے ایف سی کوالیفائر میں ہندوستان اور افغانستان کی ٹیمیں آمنے سامنے ہوئیں۔دونوں ٹیموں کے درمیان دلچسپ اور سنسنی خیز مقابلہ ہوا۔
میزبان ہندوستان نے جارحانہ انداز میں کھیل کامظاہرہ کرتے ہوئے مہمان ٹیم پر دباو بنانے کی بھر پور کوشش کی اس میں اسے کامیابی بھی ملی۔ہندوستان کے لیے اپنا 150 واں بین الاقوامی میچ کھیل رہے چھتری نے میچ کا پہلا گول 38ویں منٹ میں کیا۔
افغانستان کی ٹیم ایک صفر سے پچھڑنے کے باوجود اسکور برابر کرنے کی بھر پور کوشش کی لیکن ناکام رہی۔ہندوستان کی ٹیم پہلے ہاف کے اختتام تک ایک صفر کی برتری برقرار رکھنے میں کامیاب رہی۔
یہ بھی پڑھیں:آئی پی ایل 2024 کے مکمل شیڈول کا اعلان، 26 مئی کو چنئی میں فائنل - IPL 2024 Schedule
دوسرے ہاف میں مہمان ٹیم افغانستان جارحانہ کھیل کا مظاہرہ کرتے ہوئے میزبان ٹیم پر دباو بنانے میں کامیاب رہی ۔افغانستان کی جانب سے رحمت اکبری نے 70ویں منٹ اور شریف محمد نے 88ویں منٹ میں گول کرکے مقابلہ 2-1 سے جیت لیا۔
