ఫినాయిల్​ దాడితో మూర్ఛపోయిన నాగుపాము- ఆక్సిజన్​ ఇచ్చి వైద్యుల ట్రీట్​మెంట్​

Snake Rescued Giving Oxygen Viral Video : స్పృహతప్పి పడిపోయిన నాగుపాముకు ఆక్సిజన్​ అందించి కాపాడారు వైద్యులు. అనంతరం ఆ పామును సమీపంలోని అటవీ ప్రాంతంలో విడిచిపెట్టాడు స్నేక్​ క్యాచర్​. కర్ణాటకలోని రాయచూరు జిల్లాలో ఈ సంఘటన జరిగింది.

అసలేమైందంటే?
రాయచూరు జిల్లా.. హట్టి చిన్నగాని గ్రామ శివారల్లోని ఓ ఇన్నోవా కారులో నాగుపాము ఉన్నట్లు హట్టీ గోల్డ్‌ మైనింగ్ కంపెనీ ఆస్పత్రి డాక్టర్‌ రబీంద్రనాధ్‌ గుర్తించారు. స్థానికులు ఆ పామును పట్టుకునేందుకు ఎంత ప్రయత్నించినా సాధ్యం కాలేదు. ఎలాగైనా పామును బయటకు రప్పించాలన్న ఉద్దేశంతో ఫినాయిల్​ను పిచికారీ చేశారు. దాని వాసనకు నాగుపాము మూర్ఛపోయింది. వెంటనే స్నేక్​ క్యాచర్​ ఖలీద్​ చావూస్​ను రప్పించారు. అతడు నాగస్వరం ఊదినా, ఇంకెన్ని రకాలుగా ప్రయత్నించినా పాములో చలనం లేదు.

ఆ తర్వాత పామును స్థానిక ఆస్పత్రికి తరలించారు ఖలీద్​ చావూస్​. మనిషిలానే మంచంపై ఉంచి వైద్యులు.. చిన్న పైపు ద్వారా ఆక్సిజన్​ అందించారు. దీంతో స్పృహ తప్పి పడిపోయిన నాగుపాము మళ్లీ సాధారణ స్థితికి చేరుకుంది. ఆ తర్వాత స్థానికంగా ఉన్న అడవుల్లో సర్పాన్ని ఖలీద్​ సురక్షితంగా విడిచిపెట్టాడు.