Kishan Reddy Reacts to Chandrababu Naidu Arrest : 'ముందస్తు నోటీసులు, ఎఫ్​ఐఆర్​లో పేరు లేకుండా చంద్రబాబును అరెస్టు చేశారు'

Kishan Reddy Reacts to Chandrababu Naidu Arrest : దేశవ్యాప్తంగా సంచలనంగా మారిన టీడీపీ అధినేత, మాజీ సీఎం నారా చంద్రబాబు నాయుడు అరెస్టుపై జాతీయ నేతలు తీవ్రస్థాయిలో స్పందిస్తున్నారు. అసలు చంద్రబాబు అరెస్టు అక్రమమని ముక్త కంఠంతో ఖండిస్తున్నారు. తాజాగా కేంద్రమంత్రి, బీజేపీ రాష్ట్ర అధ్యక్షుడు కిషన్​ రెడ్డి స్పందించారు. ఆంధ్రప్రదేశ్​ బీజేపీ అధ్యక్షురాలు పురందేశ్వరీ.. చంద్రబాబు అరెస్టు గురించి తన దృష్టికి తీసుకువచ్చారని తెలిపారు.

ముందస్తు నోటీసులు, ఎఫ్​ఐఆర్​లో పేరు లేకుండా చంద్రబాబును అరెస్టు చేశారని తెలిసిందని అన్నారు. తనకు అంత వరకే విషయం తెలుసని తానింకా డాక్యుమెంట్లు చూడలేదని వివరించారు. సెప్టెంబరు 17న తెలంగాణ విమోచన దినోత్సవ వేడుకల సన్నాహకాలలో భాగంగా.. నేతలకు దిశానిర్దేశం చేస్తూ.. హైదరాబాద్​లోని బీజేపీ కార్యాలయంలో మాట్లాడారు.  సోమవారం బీజేపీ రాజ్యసభ సభ్యుడు కె. లక్ష్మణ్​ చంద్రబాబు అరెస్టు తీరును ఖండించారు. జాతీయ నేతలు మమతా బెనర్జీ, అఖిలేశ్​ యాదవ్​.. ఆంధ్రప్రదేశ్​లో రాజకీయ కక్షతోనే టీడీపీ అధినేతను అరెస్టు చేశారని మండిపడ్డారు. ఇలా ప్రతిపక్ష నేతలను అవినీతి మరక చూపి అరెస్టు చేయడం.. రాష్ట్రాన్ని ప్రభుత్నానికి తగదని సీఎం జగన్​పై విమర్శలు చేశారు.