KA Paul Fires on CM KCR : కేసీఆర్​పై కామారెడ్డిలో పోటీకి నేను సిద్ధం : కేఏ పాల్​

KA Paul Fires on CM KCR at Kamareddy : రైతులు తనకు అండగా ఉంటే.. సీఎం కేసీఆర్​పై కామారెడ్డిలో పోటీకి సిద్ధమని ప్రజాశాంతి పార్టీ వ్యవస్థాపకుడు కేఏ పాల్​ తెలిపారు. కామారెడ్డిలో ముఖ్యమంత్రి కేసీఆర్​ను ఓడించడానికి రైతులు తీసుకున్న నిర్ణయాన్ని స్వాగతిస్తున్నట్లు చెప్పారు. సదాశివనగర్​ మండలం అడ్లూర్​ ఎల్లారెడ్డిలో కామారెడ్డి మాస్టర్​ ప్లాన్​ భూ బాధిత రైతుల సమావేశానికి ముఖ్య అతిథిగా కేఏ పాల్​ హాజరయ్యారు. ఈ సందర్భంగా కేసీఆర్​పై విమర్శలు చేశారు. ధరణి పోర్టర్​ ద్వారా కేసీఆర్​ అనేకమంది పేదల భూములు లాక్కున్నారని మండిపడ్డారు. 

మాస్టర్​ ప్లాన్​ రద్దు కోరుతూ.. హైకోర్టుకి వెళ్తే పోలీసులు అడ్డుకోవడం దారుణమన్నారు. ఈ ఎన్నికల్లో బీఆర్​ఎస్​, బీజేపీ, కాంగ్రెస్​ పార్టీలు మూడు ఒక్కటేనని చెప్పారు. అందుకే ఏ పార్టీకి ఓటు వేసినా కేసీఆర్​కు ఓటు వేసినట్లే అవుతుందన్నారు. కుల, మత, రాజకీయాలకు అతీతంగా రైతులు ఏకం కావాలని.. అంతా ఏకమై కేసీఆర్​ను ఓడించాలని కోరారు. రైతుల కోసం ప్రాణాలు అర్పించడానికైనా తాను సిద్ధమని కేఏ పాల్​ వివరించారు. కామారెడ్డిలో ఈ ఎన్నికల్లో కేసీఆర్​ను ఓడిస్తే ఉచిత విద్య, వైద్యం కల్పిస్తానని హామీ ఇచ్చారు.