Bike Accident Viral Video in Adilabad : నడుచుకుంటూ వెళ్తున్న వ్యక్తిని ఢీకొట్టిన బైక్.. ప్రమాదవశాత్తు మీద పడిన యాసిడ్.. ఆ తర్వాత..!

Bike Accident Live Video in Adilabad : రోడ్డు మీద వెళ్తుండగా.. ఓ వ్యక్తిని ద్విచక్రవాహనం ఢీ కొట్టింది. దీంతో ఆ వ్యక్తి దగ్గర ఉన్న యాసిడ్​ వాహనదారుడు, వ్యక్తిపై పడి గాయాలయ్యాయి. ఈ ఘటన ఆదిలాబాద్​ జిల్లాలో జరిగింది. స్థానికులు తెలిపిన వివరాల ప్రకారం.. ఆదిలాబాద్ పట్టణంలోని అశోక్ రోడ్డులో వినయ్ అనే యువకుడు బంగారు నగలు కడగటానికి ఉపయోగించే యాసిడ్​(Acid)ను తన నగల దుకాణానికి తీసుకెళ్తున్నాడు. మార్గమధ్యలో ద్విచక్ర వాహనంపై వెళ్తున్న అతిక్ అహ్మద్ అనే వ్యక్తి వినయ్​ను ఢీ కొట్టాడు. దీంతో వినయ్​ దగ్గర ఉన్న యాసిడ్​ ప్రమాదవశాత్తు ఆ ఇద్దరిపై పడింది. దాంతో వారిద్దరి ముఖాలపై ఉన్న చర్మమంతా నల్లగా కమిలిపోయింది. ఈ ఘటనను గమనించిన స్థానికులు వారికి సాయం చేశారు. వారికి తక్షణమే ప్రథమ చికిత్స అందించారు. బాధితులు యాసిడ్​ మంట నుంచి కోలుకున్న తర్వాత స్థానిక ఆసుపత్రికి వెళ్లి.. చికిత్స తీసుకున్నారు. ఈ ప్రమాద దృశ్యాలు పరిసర ప్రాంతాల్లో ఉన్న సీసీ కెమెరాల్లో రికార్డు అయ్యాయి. దీంతో సామాజిక మాధ్యమంలో ప్రస్తుతం వైరల్​గా మారాయి.