రోజంతా విశ్రాంతి లేకుండా పనిచేసే కండరాల్లో నయనాలు ముందు వరసలో ఉంటాయి. మరి, ఆ కళ్లు అలసిపోకుండా ఉండాలంటే యోగా చేయాలంటున్నారు నిపుణులు. కళ్లకు శక్తినిచ్చే యోగాలో ఓ మూడు ముద్రలు కళ్ల అలసటను దూరం చేస్తాయన్నారు.. కైవలళ్యధామ్ యోగా సంస్థలో సలహాదారు, జనరల్ సర్జన్ డాక్టర్ సతీష్ పతాక్. మరి అవేంటో చూసేయండి...
- బ్రహ్మ ముద్ర
- వ్యాఘ్ర ముద్ర (సింహ ముద్ర)
- త్రాతక్
బ్రహ్మ ముద్ర
బ్రహ్మ ముద్ర వేయడం వల్ల ముఖ, కను కండరాల్లో రక్త ప్రసరణ పెరుగతుంది. మరి ఈ ముద్ర ఎలా వేయాలంటే..
- మెడ కండరాలు వదులుగా పెట్టండి. ఆపై మెల్లిగా ఎడమవైపుకు తిప్పండి. కొద్ది క్షణాలు ఉంచి మళ్లీ ముందుకు తీసుకురండి. ఇప్పుడు మళ్లీ కుడివైపుకు తిప్పండి. కొద్ది సెకండ్లు ఆగి, నిదానంగా యాథాస్థితికి తీసుకురండి.
- ఇప్పుడు మెడను నిదానంగా పైకెత్తి కొద్దిసేపుంచి, కిందికి దించండి. మళ్లీ ఛాతీని తాకే విధంగా తలను దించి కాసేపుంచి మళ్లీ యాథాస్థితికి తీసుకురండి.
- ఎడమ వైపు కాసేపు, కుడివైపు కాసేపు వంచి ఉంచండి. మళ్లీ తటస్థ స్థితిలోకి తీసుకురండి.
- చివరిగా తలను మెల్లిగా కుడి నుంచి ఎడమ వైపుకు, ఎడమ నుంచి కుడికి తిప్పండి.
- మెడ నొప్పులు ఉన్నవారు తలను కిందికి వంచకుండా పక్కలకు తిప్పొచ్చు.
- ఈ ముద్రలన్నీ కళ్లుమూసుకుని.. మీకు వీలైనన్ని సార్లు చేయాలి.
- బ్రహ్మ ముద్ర పూర్తయ్యాక, ఓ నిమిషం తర్వాత నిదానంగా కళ్లు తెరవాలి. అప్పుడే తాజాగా భావన కలుగుతుంది.
సింహ ముద్ర
- ముక్కుతో ఊపిరి పీల్చుకుని, నోరు వీలైనంత తెరచి, నాలుక బయటికి తీసి కళ్లు పెద్దవి చేసి గాలిని వదలాలి. ఇలా మూడు సార్లు పునారావృతం చేయాలి.
- ఈ ముద్రను మూడేళ్ల వయసు నుంచి వృద్ధుల దాకా ఎవరైనా చేయొచ్చు.
మరి ఎవరు చేయొద్దు...
- కన్నుగుడ్డు ఉబ్బినవారు ఈ సింహ ముద్ర చేయకూడదు.
- గ్లౌకోమా వంటి కంటి సమస్యలు ఉన్నవారు చేయరాదు.
- గర్భంతో ఉన్నవారు సింహ ముద్ర వేయడం అంత మంచిది కాదు.
త్రాతక్
- 15 ఏళ్ల వయసును మించినవారెవరైనా ఈ త్రాతక్ ముద్ర వేయొచ్చు. యోగా నిపుణుల ఆధ్వర్యంలో చేయడం మరింత ఉత్తమం. త్రాతక్ అంటే ఓ బిందువు, లేదా నిప్పు కణిక మీద దృష్టిని కేంద్రీకృతం చేయడమే. అయితే, కంటి సమస్యలతో బాధపడేవారు ఈ ప్రయోగం చేసి కంటికి మరింత ఒత్తిడి కలిగించకూడదు.
- ఈ త్రాతక్ ముద్రను ఉదయాన్నే చేయడం ఉత్తమం. ఉదయం వేళ పచ్చదనం వైపు చూడటానికి ప్రయత్నించండి, సుదూర వస్తువుపై ఓ నిమిషం పాటు దృష్టిని కేంద్రీకరించండి.
- ఆ తర్వాత రెండు అరచేతులను రాపిడి చేసి కళ్లపై సున్నితంగా కప్పేయండి. అలా చేతుల కిందే కనురెప్పలను తెరిచి మూయండి. ఇలా ఓ 15-20 నిమిషాలు చేయండి.
ఉదయించే సూర్యుడిని చూడండి..
ఈ ముద్రలతో పాటు కంటిని కాపాడుకునే మరికొన్ని పురాతన పద్ధతులు పాటిస్తే మంచి ఫలితాలుంటాయి.
తెల్లవారుజామున సూర్యుడు ఉదయించే సమయంలో.. సూర్య రశ్మిని చూసే ప్రయత్నం చేయండి. అయితే, ఈ ప్రక్రియను బారెడు పొద్దెక్కాక చేస్తే మొదటికే మోసం వస్తుంది.
ఉదయం లేచిన వెంటనే, కళ్లపై తడి గుడ్డను వేసి కాసేపు విశ్రాంతి తీసుకోండి. తడిగుడ్డ కాకపోతే దోసకాయ, క్యారెట్, బంగాళదుంప, లేదా పచ్చి అరటిపండును వాడొచ్చు.
ఇలా ఈ పద్ధతులన్నీ పాటిస్తే కంటి కండరాలకు ఎంతో శక్తి లభిస్తుంది. దీంతో కళ్లు కళకళలాడతాయి.
ఇదీ చదవండి: ఎల్లలు దాటిన 'స్వాతంత్ర్య' భారత సంబరం!
