World Egg Day 2023 : గుడ్డుతో బోలెడు లాభాలు.. రోజుకు ఎన్ని తినొచ్చు?.. కొలెస్ట్రాల్ పెరుగుతుందా?

World Egg Day 2023 : అన్ని వయసుల వారికి సంపూర్ణ ఆహారంగా పనికొచ్చే గుడ్డు ప్రాముఖ్యత అంతా ఇంతా కాదు. పసిపిల్లల మొదలుకొని పండు ముసలి వరకు చాలా ఇష్టంగా తినే వాటిలో గుడ్డు టాప్​లో ఉంటుంది. అయితే కోడి గుడ్డులోని తెల్లసొన తింటే శరీరంలో పెరిగిపోతుందని కొందరు భయపడుతుంటారు. మరి గుడ్డులోని తెల్లసొన తింటే లావైపోతామా? లేదా తెలుసుకుందాం పదండి.

World Egg Day 2023 : ఈ ప్రపంచంలో.. మంచి రుచికరమైన, సురక్షితమైన, పోషకాలన్నీ సమృద్ధిగా ఉన్న, చవకైన, చిటుక్కున వండుకోవటానికి వీలైన, అన్ని కాలాల్లోనూ దొరికే, అన్ని వయసుల వారికీ నచ్చే ఆరోగ్యకరమైన ఆహార పదార్థం ఏదైనా ఉందా...? సమాధానం ఒక్కటే! గుడ్డు! చాలామంది పాలను సంపూర్ణ ఆహారం అంటుంటారు. మిగతావేమీ తీసుకోకపోయినా ఒక్క పాలును తీసుకుంటే చాలా పోషకాలు లభిస్తాయని భావిస్తుంటారు. అయితే పాలకు సరిసాటిగా నిలిచే సంపూర్ణ ఆహారం.. గుడ్డు! విటమిన్‌-సి, పీచు పదార్థం- ఈ రెండూ మినహా మిగతా అన్ని పోషకాలూ, అన్ని విటమిన్లూ, ఖనిజాలూ ఉంటాయి గుడ్డులో. అయితే గుడ్డులోని తెల్లసొన తినడం వల్ల శరీరంలో కొలెస్ట్రాల్ స్థాయిలు పెరుగుతాయని భయపడుతుంటారు కొందరు. ఈ విషయంలో పోషకాహార నిపుణులు ఏమంటున్నారో వరల్డ్ ఎగ్​డే (World Egg Day) సందర్భంగా తెలుసుకుందాం.

గుడ్డులో ఉండే షోషకాలు..
Health Benefits of Eating Eggs Everyday : తెల్లసొనలో ప్రొటీన్లు, రైబోఫ్లేవిన్, మెగ్నీషియం, పొటాషియం, సోడియం, సల్ఫర్, జింక్ వంటి ఖనిజాలు, విటమిన్లు పుష్కలంగా లభిస్తాయి. పచ్చసొనలో విటమిన్లు ఎ, డి, ఈ అధికంగా లభిస్తాయి. ఇవన్నీ ఆరోగ్యానికి చాలా అవసరం. శరీరం, గుండె ఆరోగ్యానికి అవసరమైన ఒమెగా 3 ఫ్యాటీ ఆమ్లాలు గుడ్డులో అధిక మొత్తంలో ఉంటాయి.

కోడి గుడ్డు ప్రోటీన్లు, విటమిన్లు అందించే మంచి ఆహారమైనా.. ఇందులో కొలెస్ట్రాల్​ ఉంటుందని చాలా మంది భయపడుతుంటారు. ముఖ్యంగా గుడ్డులోని పచ్చసొన తింటే లావు అయిపోతామనే భావన ఎక్కువగా ఉంటుంది. అలా భ్రమపడి గుడ్డు తినకుండా ఉండొద్దని నిపుణులు చెబుతున్నారు. పచ్చసొనలో శరీరానికి కావాల్సిన మంచి కొలెస్ట్రాల్ ఉంటుందని అంటున్నారు. ఇతర ఆహార పదార్థాలతో పోలిస్తే పచ్చసొనలో ఉండే కొలెస్ట్రాల్​ చాలా తక్కువగా చెబుతున్నారు.

"గుడ్డును ఆమ్లెట్​ల రూపంలో లేదా బేకరీ పదార్థాలతో కలిపి తీసుకంటే కొలెస్ట్రాల్ అధికంగా ఉంటుంది. ఆరోగ్యంగా ఉండాలంటే గుడ్డును ఉడికించి తీసుకోవటం మంచిది. ఎటువంటి అనారోగ్య సమస్యలు లేని వారు రోజుకు రెండు గుడ్లు తిన్నా.. ఎటువంటి నష్టం ఉండదు. ఆరోగ్యంగా ఉండే వారు ప్రతిరోజు ఒక కోడి గుడ్డును తీసుకుంటే శరీరానికి కావాల్సిన పోషకాలు, విటమిన్లు అందుతాయి. ఆరోగ్య సమస్యలు ఉన్నవారు మితంగా గుడ్డును తీసుకుంటే మంచిది."
-డాక్టర్​ శ్రీలత, డైటీషియన్

Eating Egg Daily : పప్పులతో పోలిస్తే.. గుడ్డులో ఉండే ప్రోటీన్లు తేలికగా జీర్ణమవుతాయి. అందువల్ల ఇవి చిన్నారుల ఎదుగుదలకు బాగా తోడ్పడతాయి. ఎదిగే పిల్లలకు అన్నం, పప్పులతో పాటు గుడ్డును కూడా రోజు వారి ఆహారంలో చేర్చితే మంచిదని పోషకాహార నిపుణులు చెబుతున్నారు. అంతేగాక రోగనిరోధక శక్తి కూడా పెరుగుతుందని అంటున్నారు. 'జ్ఞాపకశక్తి పెరగడానికి, గుండె ఆరోగ్యంగా ఉండానికి గుడ్డు సాయపడుతుంది. రోజూ ఉడికించిన కోడి గుడ్డు తినడం వల్ల రక్త సరఫరా మెరుగుపడుతుంది. రక్తపోటును అదుపులో ఉంచుతుంది. శరీరానికి కావాల్సిన పోషకాలను సమతుల్యం చేయడానికి కోడి గుడ్డు ఉపయోగపడుతుంది. గుడ్డు తింటే ప్రయోజనాలు అధికంగా ఉన్నాయని ఎక్కువగా తినకూడదు.' అని నిపుణులు చెబుతున్నారు.