ఇంటర్మిటెంట్ ఫాస్టింగ్.. ఇటీవల బాగా ప్రాచుర్యంలోకి వచ్చింది. ఇది గుండె ఆరోగ్యాన్ని కాపాడుతునే షుగర్ రోగులకు ఉపయోగపడుతుంది. అయితే ఇది కొన్ని వందల ఏళ్లుగా మన పూర్వీకులు అలవరుచుకున్న నియమావళి. పూర్వం పెద్దలు అనారోగ్యంతో బాధపడుతున్న సమయంలో లంకణం అనే ఉపవాస పద్ధతిని అనుసరించేవారు. లంకణం అంటే భోజనం మానేయడం. ఆ సమయంలో భోజనం మానేయడమనేది కూడా ఓ ఔషధంగా పరిగణించేవారు. అనారోగ్యంగా ఉన్న సమయంలో ఆహారం తక్కువగా తీసుకునేవారు. తిన్న ఆహారంలో మసాలాలు లేకుండా చూసుకునేవారు. ఇలా చేస్తే తమ ఆరోగ్యం కుదుటపడుతుందని వారి విశ్వాసం. ఈ విధానాన్నే ఇప్పుడు ఇంటర్మిటెంట్ ఫాస్టింగ్గా పిలుస్తున్నారు.
ఇంటర్మిటెంట్ ఫాస్టింగ్ అంటే నియమిత సమయం వరకు ఆహారం తినకుండా ఉండటం. రెండు భోజనాల మధ్య గ్యాప్ ఇవ్వడమే ఈ ఫాస్టింగ్ ముఖ్య ఉద్దేశం. ఉదాహరణకు ఒకవేళ ఎవరైనా మధ్యాహ్నం 12 గంటలకు తింటే.. మళ్లీ ఎనిమిది గంటల విరామం తీసుకుని రాత్రి ఎనిమిది 8 గంటలకు తినాలి. అలా మరుసటి రోజు ఉదయం వరకు ఎటువంటి ఆహారం తీసుకోకుండా తిరిగి ఆ రోజు మధ్యహ్నం తీసుకుంటే ఇంటర్మిటెంట్ ఫాస్టింగ్లో ఓ లైఫ్ సైకిల్ ముగుస్తుంది.
వెయిట్ లాస్కు ఉపయోగ పడే విధానాల్లో బాగా ప్రాచుర్యం పొందిన ఈ ప్రక్రియను డైట్ అనడం కంటే మన జీవన శైలిలో ఒక భాగంగా పరిగణించాలని నిపుణులు అంటున్నారు. ఎందుకంటే ఈ విధనాంలో ఎటువంటి ఆహారపు నియమాలను పాటించాల్సిన అవసరం లేదు. కేవలం రోజువారీ ఆహారపు అలవాట్లతో పాటు దాన్ని తీసుకునే సమయాన్ని మాత్రమే ఈ ఇంటర్మిటెంట్ డైట్లో పరిగణిస్తారు.
- సూమారు 8 గంటల గ్యాప్తో ఏదైనా ఆహారాన్ని తీసుకునే విధానమే ఇంటర్మిటెంట్ ఫాస్టింగ్. అయితే ఈ ఎనిమిది గంటలను తమ వ్యక్తిగత సౌలభ్యాల బట్టి ఎవరికి వారు మార్చుకోవచ్చని నిపుణులు అంటున్నారు.
- ఒక వేళ ఉదయం పూట తినకుండా ఉండగలరని భావిస్తే ఈజీగా బ్రేక్ఫాస్ట్ను స్కిప్ చేయచ్చు. దాని బదులు ఒకేసారి లంచ్లో తినొచ్చు. ఆ తర్వాత రాత్రి 7 గంటలకు కానీ ఎనిమిది గంటలకు కానీ డిన్నర్ చేసి మళ్లీ 16 గంటల గ్యాప్ తీసుకుని తిరిగి భోజనం చేయవచ్చు.
- దీనిలో మనం చేసేదల్లా ఒక్క మీల్స్ స్కిప్ చేయడం మాత్రమే. అలా అని మిగతా రెండు మీల్స్లో ఎక్కువ క్యాలరీల గల ఆహారాన్ని తీసుకుంటే అప్పుడు ఈ ఇంటర్మిటెంట్ ఫాస్టింగ్ వెయిట్ లాస్కు ఏమాత్రం ఉపయోగపడదని నిపుణులు అంటున్నారు.
- ఈ విధానాన్ని కూడా ఒక్కొక్కరు ఒక్కో విధంగా ఫాలో అవుతుంటారు. ఒకరేమో రోజూ పాటిస్తే.. మరొకరు వారానికి ఒకసారి పాటిస్తారు. అయితే చెక్కర స్థాయిని తగ్గించి కొలెస్ట్రాల్కు చెక్ పెట్టడమే ఈ ఫాస్టింగ్ ముఖ్య ఉద్దేశం.
- మనం తినే ఆహార సమయాన్ని రోజులో కొన్ని గంటలకు పరిమితం చేయడం.. మిగిలిన సమయం ఎటువంటి ఆహారం తీసుకోకుండా ఉండటం వల్ల శరీరంలో ఇన్సులిన్ ఉత్పత్తి చేయాల్సిన అవసరం గణనీయంగా తగ్గిపోతుంది. అంతే కాకుండా శరీరానికి ఎనర్జీ అవసరమైనప్పుడు మనలో ఎప్పటి నుంచో నిల్వ ఉన్న కొవ్వును శరీరం ఉపయోగించుకుంటుంది.
ఆహారం తీసుకోవడానికి కూడా ఓ క్రమశిక్షణ అవసమని నిపుణులు అంటుంటారు. ఇతర డైటింగ్ విధానం లాగా కొవ్వు పదార్థాలు, కార్బోహైడ్రేట్స్ తినకూడదని ఈ ఫాస్టింగ్ విధానం చెప్పదు. ఈ డైట్లో కేవలం సమయం పాటించడమే మఖ్యం. అయితే జంక్ ఫుడ్ జోలికి వెళ్లకుండా ఉండటం మంచిదని చెప్తున్నారు నిపుణులు. మన శరీరంలో ఇన్ఫ్లెమేటరీ మార్కర్స్ అనే కొన్ని కెమికల్స్ దీర్ఘకాలిక సమస్యలకు దారి తీస్తుంటాయి. అవన్నీ ఈ ఫాస్టింగ్ వల్ల తగ్గుముఖం పడతాయి. దీని వల్ల మధుమేహం, గుండె సంబంధిత రోగాలు తగ్గడమే కాకుండా ఆయుష్షు పెరుగుతుంది.
అయితే కొందరు మాత్రం ఈ ఫాస్టింగ్ చేయకుండా ఉండటమే మంచిదని వైద్యులు సూచిస్తున్నారు. గర్భిణీలు, పాలిచ్చే తల్లులు, నెలసరి క్రమంగా రాకుండా ఉండేవారితో పాటు ముందుగానే నెలసరి ఆగిపోయిన వారు, 18-20 సంవత్సరాల మధ్య వయస్సులో ఉన్న యువత.. ఈ రకమైన ఫాస్టింగ్కు దూరంగా ఉండాలని సిఫార్సు చేస్తున్నారు. రెగ్యులర్ మీల్స్తో పాటు ట్యాబ్లెట్స్ వేసుకునే వారు, దీర్ఘకాలిక మధుమేహం, కడుపులో అల్సర్ ఉన్నవారు సైతం ఈ ఇంటర్మిటెంట్ ఫాస్టింగ్కు నో చెప్పాలని అంటున్నారు.
ఇంటర్మిటెంట్ ఫాస్టింగ్ వల్ల లాభాలు..
- బరువు తగ్గడం
- శరీరంలో కొవ్వు శాతం తగ్గి గుండె సమస్యలకు చెక్
- మెదడు చురుకుదనంతో పాటు ఆయుష్షు పెరుగుదల
గుడ్ రిజల్ట్స్ కోసం ఇవి ఫాలో అయిపోండి మరి..
- పోషకాలు పుష్కలంగా ఉన్న ఆహారానికి ఎస్
- చేప నూనె, గింజలు, విత్తనాలు ధాన్యాలను తీసుకోవాలి
- కొవ్వు శాతం తక్కువగా ఉండే ప్రొటీన్స్ను ఆహారంలో భాగం చేసుకోవాలి
- ఫైబర్ ఎక్కువగా ఉండే పళ్లు కూరగాయలును తినాలి
- విటమిన్స్, మినరల్స్ ఎక్కువగా ఉన్న ఆహారాన్ని తినడాన్ని అలవరుచుకోవాలి
