విద్యుదాఘాతంతో గొర్రెల కాపరి మృతి

ప్రమాదవశాత్తు కరెంట్‌ తీగలు తగిలి విద్యుదాఘాతంతో ఓ గొర్రెల కాపరి మృత్యువాత పడ్డాడు. ఈ ఘటన యాదాద్రి భువనగిరి జిల్లా తుర్కపల్లి మండలంలో జరిగింది.

యాదాద్రి భువనగిరి జిల్లా తుర్కపల్లి మండలం గొల్లగూడెం గ్రామానికి చెందిన సిరబోయిన బాలయ్య అనే వ్యక్తి విద్యుత్‌ షాక్‌తో మృతి చెందాడు. తన గొర్రెల మేత కోసం కొమ్మలు కొడుతున్న సమయంలో అనుకోకుండా కరెంట్ తీగలు తగిలి ఈ దుర్ఘటన సంభవించింది.

బాలయ్య మృతితో గ్రామంలో విషాద ఛాయలు అలుముకున్నాయి. ఇంటిపెద్ద మృతితో అతని కుటుంబీకులు కన్నీరుమున్నీరయ్యారు. ఘటనా స్థలానికి చేరుకున్న పోలీసులు ప్రమాదంపై విచారణ చేపడతామని తెలిపారు.

ఇవీ చదవండి :లాక్​డౌన్​పై సీఎం సమీక్ష.. పటిష్ట అమలుకు ఆదేశం