యాదాద్రి భువనగిరి జిల్లా మోత్కూర్లో స్వాతంత్ర సమరయోధుడు వేమవరం మనోహర్ పంతులు శత జన్మదినోత్సవాన్ని ఘనంగా నిర్వహించారు. భువనగిరి పార్లమెంటు సభ్యులు కోమటిరెడ్డి వెంకట్రెడ్డి ముఖ్యఅతిథిగా హాజరయ్యారు. ఈ సందర్భంగా మనోహర్ పంతులుకు తెలంగాణ బాపు అనే బిరుదు ప్రధానం చేశారు. అనంతరం ఇండియన్ రెడ్ క్రాస్ ఆధ్వర్యంలో రక్తదాన శిబిరం ఏర్పాటు చేశారు.
జిల్లాకే తలమానికం
రామన్నపేట మండలం జనంపల్లిలో జన్మించిన మనోహర్ పంతులు... ఉమ్మడి నల్గొండ జిల్లాకే తలమానికమని కోమటిరెడ్డి వెంకట్ రెడ్డి కొనియాడారు. 15 ఏళ్ల పాటు స్వాతంత్ర పోరాటంలో పాల్గొన్నారని గుర్తుచేశారు. సమాజాభివృద్ధికి, బడుగు బలహీన వర్గాల అభ్యున్నతి కోసం ఎన్నో త్యాగాలు చేశారని పేర్కొన్నారు. మనోహర్ పంతులు జీవితం అందరికీ ఆదర్శనీయమన్నారు. ఈ సందర్భంగా 27 మంది స్వాతంత్ర సమరయోధులను సన్మానించారు. మనోహర్ పంతులు జీవితం ఆధారంగా చిత్రీకరించిన లఘు చిత్రాన్ని ప్రదర్శించారు.
ఈ కార్యక్రమంలో కవిపోతన దాశరథి పురస్కార గ్రహీత కూరెళ్ళ విఠాలాచారి, తెలంగాణ స్వాతంత్ర సమరయోధుల సంఘం అధ్యక్షులు పున్నం వెంకయ్య, తెలంగాణ రాష్ట్ర ఆయిల్ ఫెడ్ ఛైర్మన్ కంచర్ల రామకృష్ణారెడ్డి, మాజీ ఎమ్మెల్యే పల్లా వెంకట్ రెడ్డి, రెడ్క్రాస్ జిల్లా ఛైర్మన్ డాక్టర్ లక్ష్మీ నరసింహా రెడ్డి, సీపీఎం జిల్లా కార్యదర్శి ఎండీ జహంగీర్ పాల్గొన్నారు.
ఇదీ చూడండి: 'ఆర్ఆర్ఆర్' అభిమానులకు నిరాశ తప్పలేదు..!
