యాదాద్రి క్షేత్రాన్ని మౌలిక వసతులతో పూర్తి స్థాయిలో అభివృద్ధి చేసే క్రమంలో అధికారులు కసరత్తులు ముమ్మరం చేశారు. ఈ క్షేత్రాన్ని తిరుమల తరహాలో అభివృద్ధి పరిచే క్రమంలో... యాడా సేకరించి, కొనుగోలు చేసిన స్థలంలోని గండిచెరువు వద్ద గల 6 ఎకరాల భూమిలో బస్స్టేషన్ నిర్మించాలని నిర్ణయించారు.
సకల హంగులతో భక్తులకు అనువైన బస్టాండ్ నిర్మించేందుకు ఈ భూమిని ఆర్టీసీకి అప్పగించనున్నారు. మల్లాపురం శివారులో డిపో కోసం ఇప్పటికే పది ఎకరాలు కేటాయించారు. సీఎంవో భూపాల్ రెడ్డి ఆదేశాలతో స్థలం అప్పగించే తతంగానికి రంగం సిద్ధమైంది.
కొండపై వేగంగా పనులు...
యాదాద్రిలో జరుగుతున్న నిర్మాణ పనులు మరింత చురుకుగా సాగుతున్నాయి. కొండపై చేపట్టిన అభివృద్ధి పనులన్నింటినీ మరో వారం రోజుల్లో పూర్తి చేయాలని మంత్రి వేముల ప్రశాంత్రెడ్డి ఆదేశించగా... హరిహరుల ఆలయాలకు చెందిన కట్టడాలు ముమ్మరమయ్యాయి.
శివాలయ పునర్ నిర్మాణంలో ఉపఆలయాలకు సంప్రదాయంగా హంగులద్దుతున్నారు. ప్రధాన ఆలయంలోకి ప్రవేశించే భక్తుల కోసం కాంప్లెక్స్లోని మొదటి అంతస్తులో దర్శన వరుసల ఏర్పాట్లు పూర్తి కాగా... ఆ కింది ఫ్లోర్లో గ్రిల్స్ ఏర్పాటు చేస్తున్నారు.
