సజావుగా ముగిసిన పురపాలక పరోక్ష ఎన్నికల ప్రక్రియ

రాష్ట్రంలో హైదరాబాద్‌ తర్వాత కీలకమైన ఓరుగల్లు, ఖమ్మం కార్పొరేషన్ల పీఠాన్ని మహిళలే అధిష్ఠించారు. సీల్డ్‌ కవర్ల ద్వారా వరంగల్‌ మేయర్‌గా గుండు సుధారాణి, ఖమ్మం నగరపాలక సంస్థ మొదటి మహిళగా నీరజ పేర్లను మేయర్లుగా మంత్రులు ప్రకటించారు. ఎన్నికల పరిశీలకులు, మంత్రులు, సీనియర్‌ నేతల సమన్వయంతో ఎన్నిక ప్రక్రియను ప్రశాంతంగా పూర్తిచేశారు.

మినీ పురపోరులో తిరుగులేని విజయం సాధించిన గులాబీ పార్టీ వ్యూహాత్మకంగా ఆయా నగరపాలికలు, పురపాలికలకు మేయర్లు, ఛైర్మన్ల ఎన్నిక క్రతువు నిర్వహించారు. తెరాస అధినేత కేసీఆర్​ ప్రత్యేకంగా నియమించిన పరిశీలకుల ద్వారా మేయర్‌, డిప్యూటీ మేయర్‌, మున్సిపల్‌ ఛైర్మన్‌, వైస్​ఛైర్మన్ల అభ్యర్థుల పేర్లను సీల్డ్‌ కవర్లలో పంపించారు. అధిష్ఠానం నిర్ణయం మేరకు ఎన్నిక సజావుగా పూర్తయ్యేలా మంత్రులు, ఎమ్మెల్యేలు, పరిశీలకులు కలిసి సమన్వయంతో పనిచేశారు. ఉదయమే ఆయా కార్పొరేటర్లు, కౌన్సిలర్లతో సమావేశమైన మంత్రులు, సీనియర్‌ నేతలు ఎన్నికపై దిశానిర్దేశం చేశారు. అందుకు అనుగుణంగా మొత్తం ఎన్నిక ప్రక్రియను పూర్తిచేశారు.

గ్రేటర్ వరంగల్ మేయర్‌గా..

గ్రేటర్ వరంగల్ మేయర్‌గా గుండు సుధారాణి, డిప్యూటీ మేయర్‌గా రిజ్వాన షమీమ్ ఏకగ్రీవంగా ఎన్నికయ్యారు. ప్రిసైడింగ్ అధికారి సంధ్యా రాణి సమక్షంలో ఎన్నికల ప్రక్రియ పూర్తి చేశారు. ముందుగా కార్పొరేటర్లు ప్రమాణస్వీకారం చేసిన అనంతరం మేయర్, డిప్యూటీ మేయర్ ఎన్నికను ఓరుగల్లు కార్పొరేషన్‌ ప్రధాన కార్యాలయంలో నిర్వహించారు. మేయర్‌గా ఎన్నికైన గుండు సుధారాణి.. వరంగల్ 29వ డివిజన్ నుంచి గెలుపొందారు. డిప్యూటీ మేయర్‌గా ప్రమాణస్వీకారం చేసిన రిజ్వానా షమీమ్ వరంగల్ 36వ డివిజన్ నుంచి ప్రాతినిధ్యం వహిస్తున్నారు. ఓరుగల్లు కార్పొరేషన్‌ ఎన్నికల పరిశీలకులుగా మంత్రులు అల్లోల ఇంద్రకరణ్‌ రెడ్డి, గంగుల కమలాకర్‌ వ్యవహరించారు. సుధారాణి, షమీమ్ పేర్లను ప్రకటించిన మంత్రులు మేయర్, డిప్యూటీ మేయర్ ఎన్నికను ఆద్యంతం పర్యవేక్షించి సజావుగా జరిగేలా చూశారు. అసంతృప్తులకు తావులేకుండా అధిష్ఠానం ఆదేశాలు అమలయ్యేలా వ్యవహరించారు. గ్రేట‌ర్ వ‌రంగ‌ల్ కార్పొరేష‌న్‌లో మొత్తం 66 డివిజ‌న్లు ఉండ‌గా, తెరాస 48, భాజపా 10, కాంగ్రెస్ 4, ఇత‌రులు 4 స్థానాల్లో గెలుపొందారు. అయితే ఎన్నికల ప్రక్రియ సజావుగా జరగలేదంటూ భాజపా సభ్యులు మేయర్‌ ఎన్నికను బహిష్కరించారు.

ఖమ్మం మేయర్‌గా...

ఖమ్మం మేయర్‌గా పునుకొల్లు నీరజ, డిప్యూటీ మేయర్‌గా ఫాతిమా జోహ్రా ప్రమాణస్వీకారం చేశారు. ఖమ్మం అదనపు కలెక్టర్‌ మధుసూదన్​రావు ఎన్నిక ప్రక్రియను పర్యవేక్షించారు. కొవిడ్‌ కారణంగా ప్రమాణస్వీకారానికి ప్రత్యక్షంగా హాజరుకాలేని వారికి వీడియోకాల్‌ ద్వారా బాధ్యతలు తీసుకునేందుకు యంత్రాంగం అవకాశం కల్పించింది. తెరాస అధిష్ఠానం ఆదేశాలతో ఎన్నికల పరిశీలకులుగా వ్యవహరించిన మంత్రి వేముల ప్రశాంత్​రెడ్డి, నూకల నరేశ్​రెడ్డి సీల్డ్ కవర్‌ను కార్పొరేటర్ల ముందు తెరిచి మేయర్, డిప్యూటీ మేయర్లుగా నీరజ, ఫాతిమా జోహ్రా పేర్లను ప్రకటించారు. నగరపాలక సంస్థ కార్యాలయంలో తొలుత కొత్తగా ఎన్నికైన కార్పొరేటర్లతో ప్రమాణస్వీకారం చేయించారు. అనంతరం ఖమ్మం మేయర్‌గా పునుకొల్లు నీరజ మేయర్‌గా ప్రమాణ స్వీకారం చేశారు. ఖమ్మం కార్పొరేషన్‌గా ఏర్పడిన తర్వాత తొలిసారి మేయర్‌గా మహిళ బాధ్యతలు స్వీకరించారు. నీరజ ఖమ్మం 26వ డివిజన్ నుంచి గెలుపొందగా... డిప్యూటీ మేయర్‌గా ప్రమాణం చేసిన ఫాతిమా జోహ్రా 37వ డివిజన్ నుంచి తెరాస తరఫున ప్రాతినిధ్యం వహిస్తున్నారు.

ఆయా ప్రాంతాల్లో పార్టీ పరిశీలకులు ప్రక్రియ సజావుగా పూర్తయ్యేలా కార్పొరేటర్లు, కౌన్సిలర్లకు విప్​జారీ చేశారు. పార్టీ నిర్ణయానికి అందరూ కట్టుబడి ఉండి మేయర్‌, డిప్యూటీ మేయర్లను ఏకగ్రీవంగా ఎన్నుకున్నారు.

ఇదీ చూడండి: రాష్ట్రంలో మినీ పురపోరు ప్రక్రియ పూర్తి