Problems in Mid Day Meal in Warangal : రాష్ట్రంలోని ప్రభుత్వ పాఠశాలల్లో నాణ్యమైన విద్యతో పాటు సౌకర్యాలను కల్పిస్తున్నామని ప్రభుత్వం చెబుతున్నా.. క్షేత్రస్థాయిలో ఆ పరిస్థితులు కనిపించడం లేదు. పలుచోట్ల మధ్యాహ్న భోజనంలో సమస్యలు తలెత్తుతున్నాయి. బియ్యంలో పురుగులు వస్తున్నాయి. వరంగల్ జిల్లాలోని ఓ పాఠశాలలోని పరిస్థితులు ఇందుకు ఉదాహరణగా నిలుస్తున్నాయి. విద్యార్థులు, మధ్యాహ్న భోజన సిబ్బంది తెలిపిన వివరాల ప్రకారం.. వరంగల్ జిల్లా నర్సంపేట జడ్పీహెచ్ఎస్ మోడల్ పాఠశాల ఆవరణలో ప్రాథమిక పాఠశాల, ఉన్నత పాఠశాలలు నిర్వహిస్తున్నారు. ఉన్నత పాఠశాలలో 180 మంది విద్యార్థులు చదువుకుంటున్నారు. ఈ పాఠశాలలో గత విద్యా సంవత్సరం సరఫరా అయిన బియ్యాన్ని ప్రస్తుతం వంటకు వినియోగిస్తున్నారు. దీంతో ఆ బియ్యం పురుగులు పట్టాయి. పాఠశాలలు పునః ప్రారంభం అయిన తర్వాతా అదే బియ్యాన్ని వంటకు ఉపయోగిస్తున్నారు.
పాఠశాల మధ్యాహ్న భోజనంలో పాము.. 25 మంది చిన్నారులకు అస్వస్థత!
Problems in Mid Day Meal in Narsampeta : ప్రతి రోజూ బియ్యంలో పురుగులను తీసి వేసేందుకు వంట ఏజెన్సీ మహిళలు తీవ్ర ఇబ్బందులు పడుతున్నారు. ఎంత జాగ్రత్తగా వాటిని బియ్యం నుంచి వేరుచేసినా.. భోజనంలో పురుగులు వస్తున్నాయి. ఆ ఆహారాన్ని విద్యార్థులు చూసి తినకుండానే పక్కన పడేస్తున్నారు. మరికొంత మంది విద్యార్థులు బలవంతంగా కాస్త అన్నం తింటున్నారు. ఈ విషయం ప్రధానోపాధ్యాయుడికి తెలిసి.. అధికారులకు సమస్యను వివరించారు. పాత బియ్యం బస్తాలు వెనక్కి తీసుకుని.. కొత్తవి సరఫరా చేయాలని అధికారులను కోరారు.
"బియ్యం బస్తా నిండా పురుగులే ఉంటున్నాయి. ఎంత శుభ్రం చేసినా పోతలేవు. బిల్లులు సరిగ్గా రావడం లేదు. వంట చేయాలంటే చాలా ఇబ్బంది పడుతున్నాం. విద్యార్థులు సరిగ్గా భోజనం చేయట్లేదు. రెండు పాఠశాలల హెచ్ఎంలకు చెప్పాం. వారు ఏదోకటి చెబుతున్నారు. ఎలాగైనా వండి పెట్టండని అంటున్నారు. ఈ పాత బియ్యాన్ని తీసుకుని.. మంచి బియ్యం పంపించాలని అధికారులను కోరుతున్నాం." -ఏలిషమ్మ, వంట చేసే మహిళ
'బియ్యంలో పురుగులు రావడం గమనించాను. ఆ విషయం ఎంఆర్సీ అధికారులకు చెప్పాను. రెండు, మూడు రోజుల్లో కొత్త బియ్యం ఇస్తామని చెప్పారు. ఈ సంవత్సరం స్టాక్ కూడా రావడం ఆలస్యం అయింది. పిల్లలు చాలా ఇబ్బంది పడుతున్నారు.' - రమేష్‌ బాబు, ప్రధానోపాధ్యాయుడు
ఇవీ చదవండి :
