'ప్రస్తుతానికి క్షేమంగానే ఉన్నాం... ఏ క్షణాన ఏమవుతుందో తెలియడం లేదు..'

Wanaparthy students stuck in ukraine : ఉక్రెయిన్‌లో ఉద్రిక్తతలతో అక్కడున్న విద్యార్థులు భయం గుప్పిట్లో బిక్కుబిక్కుమంటూ కాలం గడుపుతున్నారు. భయానకర పరిస్థితుల మధ్య పిల్లలు కాలం గడుపుతుంటే.... ఇక్కడ వారి తల్లిదండ్రులు మనోవేదనకు గురవుతున్నారు. వనపర్తి జిల్లాకు చెందిన పలువురు విద్యార్థులు ఉక్రెయిన్​లో ఉన్నత చదువుల కోసం వెళ్లారు. ప్రస్తుతం అక్కడ భయానక పరిస్థితులు నెలకొనడంతో తల్లిదండ్రులు ఆందోళన పడుతున్నారు.

Wanaparthy students stuck in ukraine : ఉక్రెయిన్‌లో పాలమూరు జిల్లాలకు చెందిన వైద్య విద్యార్థులు చిక్కుకోవడంతో వారి తల్లిదండ్రులు ఆందోళనలో మునిగిపోయారు. ఉన్నత చదువులకోసం ఉక్రెయిన్​ దేశానికి వెళ్లిన వనపర్తి జిల్లాకు చెందిన విద్యార్థులు బిక్కుబిక్కుమంటూ గడుపుతున్నారుని తల్లిదండ్రులు ఆందోళన వ్యక్తం చేస్తున్నారు. వనపర్తి పట్టణానికి చెందిన మోడాల రచన, అరవింద్‌నాయుడు, పెద్దమందడి మండలం మునిగిళ్లకు చెందిన అభిలాష్‌రెడ్డి మెడిసిన్‌ అయిదో సంవత్సరం చదువుతున్నారు. వనపర్తికి చెందిన కృష్ణచైతన్య మూడో సంవత్సరం చదువుతున్నాడు. రెండు రోజుల కింద సొంతూరుకు వచ్చేందుకు ఏర్పాట్లు చేసుకోగా ఉక్రెయిన్‌ గగనతలాన్ని మూసేశారని తల్లిదండ్రులు వాపోతున్నారు. ఫోన్లు చేసి తమను అక్కడి నుంచి రప్పించుకోవాలని చెప్పినట్లు తెలిపారు. పెబ్బేరుకు చెందిన వినోద్‌కుమార్‌ ఈనెల 27న స్వదేశానికి వచ్చేందుకు ఏర్పాట్లు చేసుకోగా ఎయిర్‌బేస్‌ మూసివేయడంతో అక్కడే చిక్కుకుపోయారు. ఎప్పుడేమవుతుందో తెలియని పరిస్థితిలో బిక్కుబిక్కుమంటూ కాలం గడువుతున్నామని విద్యార్థులు ఆవేదన వ్యక్తం చేస్తున్నారు.

ఉక్రెయిన్​లో చిక్కుకున్న పాలమూరు విద్యార్థుల వివరాలు

ఇదీ చూడండి : ఉక్రెయిన్​లో చిక్కుకున్న ఉమ్మడి పాలమూరు జిల్లా వాసులు

ఉక్రెయిన్​లో ఎంబీబీస్​ ఐదో సంవత్సరం చదువుతున్నాను. మా ప్రదేశంలో నిన్నటి నుంచి చాలా ఆందోళన పరిస్థితులు ఉన్నాయి. ఎప్పుడేమి జరుగుతుందో తెలియని పరిస్థితి ఉంది. మమ్మల్ని సాధ్యమైనంత త్వరగా తరలించే ప్రయత్నం చేయాలి. నిన్న రాత్రి నుంచి ఈ ప్రాంతంలో కూడా దాడులు జరుగుతాయనే వార్తలు రావడంతో చాలా భయం వేస్తోంది. -రచన, ఎంబీబీఎస్​ విద్యార్థిని

రచన, ఎంబీబీఎస్​ విద్యార్థిని

నేను ఉక్రెయిన్​లో ఎంబీబీఎస్​ చదువుతున్నాను. మేము ఉన్న ప్రదేశంలో ప్రస్తుతం ఎలాంటి దాడులు జరగలేదు. కానీ చుట్టుపక్కల ప్రాంతాల్లో దాడులు జరుగుతున్నాయి. ఇక్కడ ఉన్న భారత విద్యార్థులను తరలించేందుకు అధికారులు చర్యలు తీసుకున్నారు. విద్యార్థుల తరలింపు ప్రక్రియ సాధ్యమైనంత వేగంగా జరగాలని కోరుతున్నాను. -అభిలాష్​ రెడ్డి, ఎంబీబీఎస్​ విద్యార్థి

అభిలాష్​ రెడ్డి, ఎంబీబీఎస్​ విద్యార్థి

ఇదీ చూడండి : క్షేమంగానే ఉన్నా.. వెంటాడుతున్న బాంబుల భయం..

పిల్లలు ఉన్నత చదువులు చదివి త్వరలోనే తిరిగొస్తారని ఎదురుచూస్తున్న తల్లిదండ్రులకు ప్రస్తుతం ఉక్రెయిన్​లో నెలకొన్న పరిస్థితులు కంటిమీద కునుకు లేకుండా చేస్తున్నాయి. ఈ పరిస్థితిలో పిల్లలు క్షేమంగా ఇంటికి తిరిగిరావాలని ప్రార్థిస్తున్నారు. ఫోన్​ మాట్లాడుతూ.. అక్కడి పరిస్థితులను తెలుసుకుంటూ.. టీవీల్లో వార్తలు చూస్తు భయాందోళకు గురవుతున్నారు. ప్రభుత్వం చర్యలు తీసుకుని తమ పిల్లలను సురక్షితంగా స్వదేశానికి తీసుకొచ్చేందుకు చర్యలు తీసుకోవాలని కోరుతున్నారు.

ఉక్రెయిన్​లో యుద్ధం మొదలైందని తెలిసినప్పటి నుంచి తిండి పోవడం లేదు. మా పిల్లాడిని చూడాలని ఎదురుచూస్తున్నాను. కునుకు పట్టడం లేదు. ఏ ఫోన్​ వచ్చినా మా పిల్లాడే చేశాడేమోనని, ఏ టీవీలో చూసినా మా పిల్లాడు కనిపిస్తాడేమోనని చూస్తున్నాం. చాలా ఆందోళనగా ఉంది. ప్రభుత్వం స్పందించి మా పిల్లలను స్వదేశానికి తీసుకొచ్చేందుకు చర్యలు తీసుకోవాలి. - అభిలాష్​ రెడ్డి తల్లి

ఇదీ చూడండి : యుద్ధ విమానాల గర్జన, బాంబుల మోత.. బిక్కుబిక్కుమంటున్న హైదరాబాదీ విద్యార్థులు