మట్టి గణపయ్యలకు సై... పర్యావరణానికి జై!

వినాయక చవితి వస్తుందంటే చాలు...  రెండు మూడు నెలల ముందునుంచే వినాయకులను తయారుచేస్తూ ఉపాధి పొందుతుంటారు చాలా మంది. కానీ ఈ ఊర్లో మాత్రం ఏడాదంతా వినాయకులను తయారు చేస్తూనే ఉంటారు. చిన్న పిల్లల నుంచి మొదలుకొని పండు ముసలి వరకు మట్టి గణపయ్యలను తయారుచేస్తూ... పర్యావరణ పరిరక్షణ కోసం పాటుపడుతున్నారు.

వికారాబాద్ జిల్లా కుల్కచర్ల మండలంలోని చాపలగూడెంలో సుమారు 400 మంది జనాభా ఉంది. అందులో కొందరు వ్యవసాయంపై ఆధారపడితే మరికొంత మంది కులవృత్తులను నమ్ముకొని జీవిస్తున్నారు. కాలక్రమేణా కులవృత్తుల ఆదరణ తగ్గడం వల్ల కుమ్మరి, కమ్మరి, వడ్రంగి తదితర కులాలకు చెందిన యువతీ యువకులు బతుకుదెరువు కోసం భాగ్యనగరం బాటపట్టారు. దొరికిన పనులు చేసుకుంటూ కుటుంబాలను పోషించుకుంటున్నారు. అయితే అదే గ్రామానికి చెందిన కుమ్మరి స్వామి అనే యువకుడు లోయర్ ట్యాంక్ బండ్ వద్ద గణపతి విగ్రహాల తయారీ కేంద్రంలో చేరాడు. కొద్దిరోజుల్లోనే ఆ పని నేర్చుకొని పీవోపీ విగ్రహాల వల్ల పర్యావరణానికి జరుగుతున్న నష్టాన్ని గ్రహించాడు. దేవుడితో ఆ పాపం చేయడమెందుకని గ్రహించి గ్రామంలో మట్టి విగ్రహాల తయారీకి శ్రీకారం చుట్టాడు. మొదట కుటుంబసభ్యులతోనే మట్టి గణపతులను తయారు చేసేవాడు.

బూజ్జాయిలు తయారు చేస్తారు

తొలుత నష్టాలను చవిచూసిన స్వామి ఎక్కడా వెనక్కి తగ్గలేదు. తను నేర్చుకున్న విద్యను గ్రామస్థులందరికీ నేర్పి ఉపాధి అవకాశాలు చూపించాడు. తమ జిల్లా పరిధిలో ఎక్కడ కూడా పీవోపీ విగ్రహాలు పెట్టకుండా పర్యావరణ పరిరక్షణ పట్ల ప్రజల్లో అవగాహన కల్పించాడు. ఆ దిశగా మట్టి విగ్రహాల తయారీలో నేర్పు సాధించిన చాపలగూడెం ప్రజలు 12 ఏళ్లుగా వాటినే తయారు చేస్తూ అందరికీ ఆదర్శంగా నిలుస్తున్నారు. పాఠశాలల వేళలు ముగిశాక, వారాంతాలు, సెలవు రోజుల్లో తమ చిట్టి చేతులతో మట్టి గణపయ్యలను తయారు చేస్తూ పర్యావరణ కోసం గట్టిమేలు చేస్తున్నారు బుజ్జాయిలు. కేవలం కుమ్మరులే కాకుండా ఇతర కులస్థులు కూడా అడుగు నుంచి 8 అడుగుల వరకు మట్టి గణపతులను తయారు చేస్తూ కుటుంబాలను పోషించుకుంటున్నారు.

నాణ్యమైన విగ్రహాల తయారీనే లక్ష్యం

ఇక్కడ తయారయ్యే మట్టి విగ్రహాలకు ఆచార్య జయశంకర్ విశ్వవిద్యాలయంలో తయారు చేసిన సేంద్రియ రంగులను తీసుకొచ్చి అద్దుతారు. సహజత్వానికి దగ్గరగా నాణ్యమైన విగ్రహాలను తీర్చిదిద్దుతారు. అలాగే విగ్రహాలకు ఉపయోగించే చెరువు మట్టిని కాలుష్య నియంత్రణ మండలి పరిశీలించాకే వినియోగిస్తారు. ఈ ఏడాది కాలుష్య నియంత్రణ మండలి కూడా చాపలగూడెం వాసులతో విగ్రహాల తయారీకి ఒప్పందం కుదుర్చుకోవడం విశేషం.

ఇతర రాష్ట్రాలలోనూ గిరాకీ

ఇక్కడ తయారవుతున్న మట్టి గణపయ్యలకు తెలుగు రాష్ట్రాలతోపాటు కర్ణాటక, మహారాష్ట్రలోనూ మంచి గిరాకీ ఉంది. ఈ గ్రామంలో ఉన్న పలువురు యువతీ యువకులు హైదరాబాద్, మహబూబ్ నగర్ ప్రాంతాల్లో ప్రత్యేక స్టాల్స్ ఏర్పాటు చేసి మట్టి గణపయ్యలను విక్రయిస్తూ ఉపాధి పొందుతుండటం మరో విశేషం.

ఇవీ చూడండి: ఈటీవీ భారత్​ కథనానికి స్పందన... బాధితులకు కలెక్టర్ ఆసరా​