తాండూరులో వర్గపోరు.. ఎమ్మెల్యే, ఎమ్మెల్సీ వర్గాల తోపులాట..

తాండూరు నియోజకవర్గంలో అధికార పార్టీ తెరాసలో వర్గపోరు తారాస్థాయికి చేరింది. తాజాగా ఎమ్మెల్యే రోహిత్ రెడ్డి, ఎమ్మెల్సీ మహేందర్ రెడ్డి మధ్య వర్గ విభేదాలు మరోసారి బయటపడ్డాయి.

వికారాబాద్ జిల్లా తాండూరులో ఎమ్మెల్యే రోహిత్ రెడ్డి, ఎమ్మెల్సీ మహేందర్ రెడ్డి మధ్య వర్గ పోరు మరోసారి బయటపడింది. తాజాగా ఇద్దరు నేతల అనుచరులు వారి సమక్షంలోనే వాగ్వాదానికి దిగారు. స్థానికంగా ఏర్పాటు చేసిన కల్యాణ లక్ష్మీ, షాదీ ముబారక్ చెక్కుల పంపీణీ కార్యక్రమంలో విభేదాలు బహిర్గతమయ్యాయి. ఈ సమావేశంలో ఎమ్మెల్యే రోహిత్ రెడ్డి, ఎమ్మెల్సీ మహేందర్ రెడ్డి పాల్గొన్నారు.

ఇది అధికారిక సమావేశం కావున అధికారులు వేదికమీద ప్రజాప్రతినిధులకు మాత్రమే సీట్లు కేటాయించారు. నామినేటెడ్ పదవులు పొందినవారిని వేదికపైనా కూర్చునేందుకు అనుమతించ లేదు. దీంతో తాండూర్ వ్యవసాయ కమిటీ అధ్యక్షుడు విఠల్ నాయక్, కోట్పల్లి అధ్యక్షుడు ఉప్పరి మహేందర్ తమను ఎందుకు అనుమతించరని తహసీల్దార్​తో గొడవకు దిగారు. నామినేటెడ్ పదవులు పొందినవారికి అధికారిక కార్యక్రమాల్లో పాల్గొనే అవకాశం లేదని ఆయన తెలిపారు. ఈక్రమంలో కాసేపు వాగ్వాదం నెలకొంది.

వేదికమీద ప్రజాప్రతినిధులకు మాత్రమే సీట్లు కేటాయించారు. ముందువరుసలో ఎంపీపీ కేటాయించిన సీటులో పీఎసీఎస్ ఛైర్మన్ రవి కూర్చున్నారు. దీనిపై ఎంపీటీసీల సంఘం అధ్యక్షుడు సాయి రెడ్డి అభ్యంతరం తెలిపారు. ప్రోటోకాల్ ప్రకారం ఆ కుర్చీలో ఎంపీపీ కూర్చోవాలి నీవు ఎందుకు కూర్చున్నావని ప్రశ్నించారు. దీంతో ఇద్దరి మధ్య తీవ్ర వాగ్వాదం జరిగింది. ఈ క్రమంలో అక్కడే ఉన్న ఎమ్మెల్యే, ఎమ్మెల్సీ అనుచరులు గొడవకు దిగారు. ఇరువురు మధ్య మాటామాట పెరిగి స్వల్ప తోపులాట జరిగింది. పోలీసులు ఇరువర్గాల వారికి సర్దిచెప్పి పరిస్థితిని అదుపు చేశారు. ఆ తర్వాత చెక్కుల పంపిణీ కార్యక్రమం సాగింది.

ఇదీ చదవండి: Harishrao on Central: ధాన్యం కొనుగోళ్లు జరగకూడదనే కేంద్రం కుట్రలు: హరీశ్‌రావు