CM Revanth Reddy Lifestyle : ఎనుముల రేవంత్రెడ్డి (CM Revanth Reddy), ప్రస్తుత తెలంగాణ ముఖ్యమంత్రి. కొడంగల్‌ అసెంబ్లీ నియోజకవర్గం నుంచి ప్రాతినిధ్యం వహిస్తున్న ఆయనకు వంట చేయడం అంటే ఎంతో ఇష్టమట. ఆటలు, చిత్రాలు గీయడం వంటి హాబీలు ఉన్నాయి. కొంతకాలం ఓ పత్రికలో జర్నలిస్టుగా పని చేశారు. రేవంత్రెడ్డి గురించి తెలుసుకునేందుకు, ఆయన నివాసంలో ఉండే మాణిక్యమ్మ, ఆశప్ప, మల్లేశ్‌లను కదిలించగా, పలు ఆసక్తికరమైన విషయాలు తెలిశాయి. వీళ్లు 14 సంవత్సరాలుగా ఇక్కడే సేవలు అందిస్తున్నారు. మరి వారు రేవంత్ రెడ్డి గురించి చెప్పిన ముచ్చట్లేంటో తెలుసుకుందామా?
CM Revanth Reddy Food Habits : రేవంత్రెడ్డి నాగర్‌కర్నూల్‌ జిల్లా వంగూరు మండలం కొండారెడ్డిపల్లి గ్రామంలో ప్రాథమిక విద్యను అభ్యసించారు. వనపర్తిలో కళాశాల స్థాయి విద్యాభ్యాసం పూర్తిచేశారు. ఆ తర్వాత హైదరాబాద్‌లో స్థిరపడి ప్రింటింగ్‌ ప్రెస్, రియల్ ఎస్టేట్ వ్యాపారాలు నిర్వహించారు. 2009 ఎన్నికల్లో కొడంగల్‌ నుంచి పోటీ చేసి విజయం సాధించారు. ఇక్కడే సొంతిల్లు నిర్మించుకున్నారు.
Revanth Reddy Biography and Real Life Story : రేవంత్రెడ్డి ఎమ్మెల్సీగా ఉన్న సమయంలో కల్వకుర్తిలో ఇంటిని నిర్మించుకున్నారు. ఏటా దసరా పండగ తర్వాతి రోజు కొడంగల్‌కు వచ్చి ప్రజలతో మాట్లాడటం ఆనవాయితీగా వస్తోంది. కొవిడ్ లాక్‌డౌన్‌ సమయంలో కొడంగల్‌లోనే ఉన్నారు. అప్పుడు రేవంత్‌రెడ్డే కుటుంబ సభ్యులకు స్వయంగా వండిపెట్టారు.
పచ్చదనానికి ప్రాధాన్యం : ముఖ్యమంత్రి రేవంత్రెడ్డి పచ్చదనానికి ఎక్కువగా ప్రాధాన్యం ఇస్తారు. ఇందులో భాగంగానే కొడంగల్‌లోని ఇంటి ప్రాంగణంలో పచ్చికతో కూడిన గార్డెన్‌ ఏర్పాటు చేశారు. చుట్టూరా ఎత్తైన ప్రహరీ నిర్మించి రకరకాల పూల మొక్కలు, చెట్లను పెంచారు. పిత సెలోబియం అర్బోరియం (కోజబా అర్బోరియా) మొక్కను రేవంత్రెడ్డి స్వయంగా నాటారు. అనంతరం ఆ చెట్టు చుట్టూ గద్దె కట్టించారు. అక్కడే కార్యకర్తలతో ఆయన సమావేశమవుతారు. 300 మంది వరకు కూర్చునే వీలుంది.
ముఖ్యమంత్రి రేవంత్రెడ్డి సోదరుడు, కొడంగల్‌ నియోజకవర్గ బాధ్యుడు తిరుపతిరెడ్డికి కుక్కలంటే ఇష్టం. కొడంగల్‌ నివాసంలో, హైదరాబాద్‌లోని నివాసంలో వాటిని పెంచుతున్నారు. అందులో బెల్జియం మిల్‌నైస్‌ జాతికి చెందిన శునకం ప్రస్తుతం కొడంగల్‌లో ఉంది.
తెల్లవారుజాము నుంచే : ముఖ్యమంత్రి రేవంత్‌రెడ్డికి రోజు ఉదయం 4 గంటలకే నిద్రలేవడం అలవాటు. ఆయన గోరువెచ్చని నీటిని తీసుకుంటారు. ఆ తర్వాత దినచర్యలో భాగంగా 30 నిమిషాల పాటు వ్యాయామం చేస్తారు. పుచ్చకాయ లేదా యాపిల్ జ్యూస్‌ ( Revanth Reddy Food Habits) తప్పనిసరిగా తీసుకుంటారు. అనంతరం పేపర్ చదివి కాసేపటికి టీ తాగుతారు. ఆ తర్వాత ముఖ్యమైన వారికి రేవంత్రెడ్డి ఫోన్‌లు చేస్తారు.
సచివాలయంలో సీఎం హోదాలో రేవంత్రెడ్డి - ఘనస్వాగతం పలికిన ఉద్యోగులు
హామీని నిలబెట్టుకున్న సీఎం రేవంత్ రెడ్డి - రజినీ ఉద్యోగ దస్త్రంపై రెండో సంతకం
ఇంటికి వచ్చిన కార్యకర్తలతో రేవంత్రెడ్డి మాట్లాడతారు. స్నానం చేసిన తర్వాత జొన్నరెట్టె లేదా చపాతి తీసుకుంటారు. ఆయనకు నాటుకోడి కూర ఎంతో ఇష్టం. మటన్‌ బిర్యానీని ఇష్టంగా తింటారు. మధ్యాహ్నం ఆలస్యమైతే డ్రైప్రూట్స్‌ పిస్తా, ఖర్జూరం, కాజు, బాదం వంటివి తీసుకుంటారు. సాంబారు, ముద్ద పప్పు, పెరుగన్నం రోజూ ఉండాల్సిందే.
ఆటలంటే రేవంత్‌రెడ్డికి అమితాసక్తి : రేవంత్‌రెడ్డికి క్రీడల పట్ల అమితాసక్తి. రెండు పర్యాయాలు ఎమ్మెల్యేగా గెలిచిన సమయాల్లో రాష్ట్ర స్థాయి హాకీ పోటీలను కొడంగల్‌లో ఏర్పాటు చేశారు. రాష్ట్రం నలుమూలల నుంచి వచ్చిన క్రీడాకారులకు, రేవంత్ తన నివాసంలోనే అన్ని వసతులు కల్పించారు. ఆయన మిత్రుడు వనపర్తికి చెందిన ఉపాధ్యాయుడు సురేందర్‌రెడ్డి ఈ పోటీలను పర్యవేక్షించారు. స్థానిక ప్రభుత్వ జూనియర్‌ కాలేజీలో పోటీలు అట్టహాసంగా నిర్వహించి విజేతలకు బహుమతులు అందజేశారు.
కుటుంబ సభ్యులంతా సొంత మనిషిలాగే చూసుకుంటారు : ముఖ్యమంత్రి రేవంత్‌రెడ్డికి నేను వంట చేసి వడ్డించడం ఎంతో సంతోషంగా ఉందని వంటమనిషి మాణిక్యమ్మ తెలిపారు. 13 సంవత్సరాలుగా ఇంట్లో వంట మనిషిగా పని చేస్తున్నానని చెప్పారు. ఏది వండినా ఏ రోజు ఒక్క మాట అనలేదని పేర్కొన్నారు. నాటుకోడి కూర చాలా ఇష్టంగా చేయించుకొని తింటారని వివరించారు. హైదరాబాద్‌ నుంచి తన వాహనంలో పండ్లు తీసుకొస్తారని, ఆయన ఇంటికి రాగానే జ్యూస్‌ కచ్చితంగా ఇవ్వాల్సిందేనని అన్నారు. కుటుంబ సభ్యులంతా సొంత మనిషిలాగే చూసుకుంటారని మాణిక్యమ్మ వెల్లడించారు.
రేవంత్ అన్నా మీతో మాట్లాడాలి - ఒక్క పిలుపుతో స్పందించి సమస్య పరిష్కరించిన సీఎం
ఎంసీహెచ్‌ఆర్డీలో సీఎం రేవంత్ రెడ్డి - అక్కడి కార్యకలాపాలపై ఆరా
