పై చిత్రంలో కనిపిస్తున్న వృద్ధుని వయస్సు 96 ఏళ్లు. రెండు కళ్లూ కనబడవు. చేతికందివచ్చిన కుమారుడు అనారోగ్యంతో మృతి చెందాడు. భార్యతో కలిసి పూరి గుడిసెలో నివాసం ఉంటూ.. ఈత బుట్టలు అమ్ముతూ జీవనం సాగిస్తున్నారు. అన్ని అర్హతలున్నా.. రెండేళ్ల నుంచి పింఛన్(Old couple request for pension) సొమ్ము అందక ఇబ్బందులు పడుతున్నారు.
సూర్యాపేట జిల్లా నూతనకల్‌ మండలం వెంకేపల్లికి చెందిన పాపయ్యకు 1990 నుంచి పింఛను వచ్చేది. కళ్లు కనిపించని కారణంగా ఐరిస్ గుర్తించకపోవడం, చేతివేళ్ల గుర్తులు చెరిగిపోవడంతో ఆయనకు ఆధార్ కార్డు మంజూరుకాలేదు. ఆధార్ అనుసంధానం కాలేదంటూ.. రెండేళ్ల నుంచి అధికారులు పింఛన్(Old couple request for pension) నిలిపేశారు. ఆధార్ కార్డు ఉన్నా భార్య రామనర్సమ్మకూ ఇవ్వడం లేదు. ఆమెకు మాత్రమే రేషన్ బియ్యం వస్తోంది. ఈత బుట్టలు అమ్మితే వచ్చేది కొంచెెం డబ్బే. తిండి ఖర్చులకు కూడా సరిపోవడం లేదు. అకస్మాత్తుగా ఏదైనా జబ్బు చేస్తే ఆస్పత్రి ఖర్చులకు రూపాయి లేదు.
ఇంతటి దుర్భర పరిస్థితుల్లోనూ ఆ జంట తమ కష్టం మీదే బతుకుతోంది. చనిపోయేవరకు ఎవరి ముందు చేయి చాచకుండా ఆత్మగౌరవంతో బతకాలని ఆశపడుతోంది. కానీ కాలే కడుపు ఆ ఆశను అడియాశ చేసేలా చేస్తోందని బాధపడుతున్నారు. ప్రభుత్వం, అధికారులు స్పందించి తమకు రావాల్సిన పింఛను(Old couple request for pension) ఇప్పించాలని కోరుతోంది ఆ వృద్ధ జంట.
- ఇదీ చదవండి : Lpg Gas Cylinder Price: ఇదేమి బండ బాదుడు?
