ప్రజల, ప్రభుత్వ ఆస్తులు కొల్లగొట్టేవారి పట్ల నిర్దయగా ఉండాలని... పురపాలక శాఖ మంత్రి కేటీఆర్ అధికారులకు దిశానిర్దేశం చేశారు. ముందుగా చర్యలు తీసుకోవాల్సి వస్తే... తమ పార్టీ వారిపైనే ఉండాలని సూచించారు. నల్గొండ జిల్లా చిట్యాల, సూర్యాపేట జిల్లా హుజూర్నగర్ పురపాలికల్లో మంత్రి పర్యటించారు. చిట్యాల విద్యుత్ ఉపకేంద్రాన్ని ప్రారంభించి.. సీసీ రహదారులు, వైకుంఠధామం నిర్మాణానికి శంకుస్థాపన చేశారు. ఉదయ సముద్రం ప్రాజెక్టుకు ఇప్పటికే నిధులు కేటాయించామని... ఇక పిలాయిపల్లి, ధర్మారెడ్డి కాల్వల నిర్మాణాల్ని త్వరితగతిన పూర్తి చేస్తామని హామీ ఇచ్చారు. ఇంతటి సంక్షోభ పరిస్థితుల్లోనూ... ఎక్కడా సంక్షేమం ఆగకుండా ముఖ్యమంత్రి దృష్టి సారించారని కేటీఆర్ తెలియజేశారు.
హామీలు నెరవేర్చే పనిలో...
హుజూర్నగర్ ఉప ఎన్నికల సమయంలో ముఖ్యమంత్రి ఇచ్చిన హామీల్ని నెరవేర్చే లక్ష్యంలో భాగంగా.. కేటీఆర్ పర్యటించారు. నూతనంగా నిర్మించిన ఆర్డీవో కార్యాలయాన్ని మంత్రి జగదీశ్ రెడ్డి, పీసీసీ అధ్యక్షుడు ఉత్తమ్ కుమార్ రెడ్డితో కలిసి ప్రారంభించారు. స్థానిక సిమెంటు పరిశ్రమల్లో యువతకు ఉపాధి లభించేలా.. నైపుణ్యాభివృద్ధి కేంద్రం సహా పట్టణ పార్కు నిర్మాణాలకు శంకుస్థాపన చేశారు. నియోజకవర్గంలోని 5 మండలాలకు గాను ఒక్కో మండలానికి రూ. 30 లక్షల చొప్పున మొత్తం రూ. కోటిన్నర.. 134 గ్రామ పంచాయతీలకు రూ. 26 కోట్ల 80 లక్షలు అందిస్తున్నామని మంత్రి ప్రకటించారు.
బుల్లెట్ రైల్..
మిగతా హామీలైన గిరిజన సంక్షేమ పాఠశాల, బంజారా భవన్, పాలిటెక్నిక్ కళాశాలతో పాటు మఠంపల్లి మండలంలో పారిశ్రామిక పార్కుకు శ్రీకారం చుడతామన్నారు. రెండు తెలుగు రాష్ట్రాల మధ్య బుల్లెట్ రైలు తిరిగితే... పెద్దయెత్తున అభివృద్ధి సాధ్యపడుతుందని కేటీఆర్ అభిప్రాయపడ్డారు.
ఇవీ చూడండి: 'మళ్లీ కరోనా పరీక్షలు.. లాక్డౌన్పై మంత్రివర్గంలో నిర్ణయం'
