సిద్దిపేట జిల్లా ములుగు మండలం బండమైలారం వద్ద రోడ్డు ప్రమాదం చోటుచేసుకుంది. ద్విచక్ర వాహనాన్ని ఎదురుగా వస్తున్న టిప్పర్ వాహనం ఢీకొట్టింది. ప్రమాదంలో ద్విచక్రవాహనంపై ఉన్న ఇద్దరు కూలీలు అక్కడికక్కడే మృతి చెందారు.
కొక్కొండ గ్రామానికి చెందిన స్వామి, కుమార్లు కూలీ పనుల కోసం మేడ్చల్కు బయలుదేరారు. బండమైలారం సమీపంలోకి రాగానే.. ఎదురుగా వస్తున్న టిప్పర్ వాహనం వారి ద్విచక్ర వాహనాన్ని ఢీకొట్టింది. ఘటనలో ఇద్దరు అక్కడికక్కడే మృతి చెందారు.
స్వామికి భార్య, కుమారుడు ఉండగా.. కుమార్కు భార్య, ఇద్దరు పిల్లలు ఉన్నారు. ప్రమాద స్థలికి చేరుకున్న మృతుల కుటుంబ సభ్యుల రోదనలు చూపరులను కంటతడి పెట్టించాయి. ఈ రహదారిపై ఎక్కువ సంఖ్యలో టిప్పర్లు తిరగడం వల్ల తరచూ ప్రమాదాలు జరుగుతున్నాయని మృతుల బంధువులు, గ్రామస్థులు రహదారిపై ఆందోళనకు దిగారు.
ఘటనా స్థలికి చేరుకున్న ఎస్సై రాజేంద్రప్రసాద్ వారికి నచ్చజెప్పడం వల్ల ఆందోళన విరమించారు. మృతదేహాలను శవ పరీక్ష నిమిత్తం గజ్వేల్ ప్రభుత్వ ఆసుపత్రికి తరలించారు. బంధువులు ఇచ్చిన ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు ఎస్సై తెలిపారు.
ఇవీ చూడండి: కరీంనగర్ నగరపాలికలో ప్రశాంతంగా పోలింగ్‌
