చెరువులను అత్యంత సుందరంగా తీర్చిదిద్దుతామని విద్యాశాఖ మంత్రి సబితా ఇంద్రారెడ్డి వెల్లడించారు. చెరువులు కబ్జాకు గురికాకుండా రక్షించడమే తమ ప్రథమ కర్తవ్యమన్నారు. రంగారెడ్డి జిల్లా జల్పల్లి పురపాలికలోని బర్హాన్ ఖాన్ చెరువు చుట్టు ప్రాంతాలు ముంపుకు గురి కాకుండా చేపట్టిన పనులను ఆమె పరిశీలించారు. ఇందుకోసం ప్రత్కేక యాక్షన్ ప్లాన్ సిద్ధం చేసినట్లు వెల్లడించారు. చెరువులన్నీ డ్రైనేజీతో నిండకుండా చర్యలు తీసుకుంటామని తెలిపారు. ఉస్మాన్ సాగర్ చెరువుకట్టను బలోపేతం చేసేందుకు అన్ని విధాలుగా కృషి చేస్తామని మంత్రి వెల్లడించారు.
ఉస్మాన్ సాగర్, జల్పల్లి రువులను సుందరీకరిస్తాం
గత వర్షకాలంలో ఉస్మాన్ సాగర్ ముంపునకు గురై ప్రజలు చాలా ఇబందులు పడ్డారని మంత్రి సబితా ఇంద్రారెడ్డి అన్నారు. ఇలాంటి సమస్యలు పునరావృతం కాకుండా పూర్తి పరిష్కారం చూపుతామని పేర్కొన్నారు. చెరువులకు రూ.21లక్షలు మంజూరు చేయడంతో పాటు బర్హాన్ ఖాన్ చెరువు కట్ట ఎత్తు పెంచి మరమ్మత్తులు చేస్తామని మంత్రి తెలిపారు. ఉస్మాన్ నగర్ ప్రాంతలోని బర్హాన్ ఖాన్ చెరువు, జల్పల్లి పెద్దచెరువు సుందరీకరణ పనులకు మరో రూ.20 లక్షలు వెచ్చించనున్నట్లు వెల్లడించారు. అనంతరం శ్రీ రాంకాలనీ ప్రాంతంలో పట్టణ ప్రగతి కార్యక్రమంలో కూడా మంత్రి సబితా ఇంద్రారెడ్డి పాల్గొన్నారు.
కలుషితం కాకుండా చర్యలు తీసుకుంటాం
చెరువులు కలుషితం కాకుండా కాపాడాలని పురపాలకశాఖ మంత్రి కేటీఆర్ ఆదేశాలిచ్చారని సబిత వెల్లడించారు. ఆయన సూచనలతో చెరువులను అభివృద్ధి చేసేందుకు ముందుకు సాగుతున్నట్లు పేర్కొన్నారు. చెరువులన్నింటినీ కూడా సుందరీకరణ చేయడం జరుగుతుందని స్పష్టం చేశారు. ఈ కార్యక్రమంలో జల్పల్లి మున్సిపల్ ఛైర్మన్ అబ్దుల్లాహ్ బిన్ అహ్మద్ సాది, మున్సిపల్ కమిషనర్ జీపీ కుమార్, పురపాలిక తెరాస అధ్యక్షులు ఇక్బాల్ బిన్ ఖలీఫా, ఉపాధ్యక్షులు సయ్యద్ యూసుఫ్ పటేల్, కౌన్సిలర్లు తదితరులు పాల్గొన్నారు.
యాక్షన్ ప్లాన్
'చెరువులన్నీ కబ్జాకు గురికాకుండా ప్రయత్నం చేస్తున్నాం. మంత్రి కేటీఆర్ ఆదేశాలతో చర్యలు చేపడుతున్నాం. ఓ యాక్షన్ ప్లాన్ ప్రకారం ప్రణాళిక రూపొందించాం. ప్రస్తుతం ఉస్మాన్ సాగర్ చెరువు, జల్పల్లి పెద్దచెరువులను ఎంపిక చేశాం. జల్పల్లి చెరువు సుందరీకరణకు నిధులు కేటాయిస్తున్నాం. చెరువులను అందంగా తీర్చిదిద్దుతాం. రూ.21 లక్షలతో ఆకర్షణీయంగా చెరువులను తీర్చిదిద్దుతాం.'
- సబితా ఇంద్రారెడ్డి, విద్యాశాఖ మంత్రి
