పుట్టినరోజు వేడుకలకు వెళ్లిన ఆ కుటుంబం ఏమైనట్లు?

పుట్టిన రోజు సందర్భంగా భార్య, కుమారుడితో సహా శ్రీశైలం వెళ్లిన కుటుంబం కనిపించకుండా పోయిన ఘటన హయత్​నగర్ ఠాణా పరిధిలో జరిగింది. తల్లిదండ్రుల ఫిర్యాదుపై కేసు నమోదు చేసుకున్న పోలీసులు దర్యాప్తు చేస్తున్నారు.

భార్య, కుమారుడితో సహా శ్రీశైలం వెళ్లిన ఓ కుటుంబం కనిపించకుండా పోయిన ఘటన రంగారెడ్డి జిల్లా హయత్​నగర్​లో జరిగింది. స్థానిక శాంతి నగర్​ కాలనీకి చెందిన శ్రీధర్​ రెడ్డి తన పుట్టిన రోజు సందర్భంగా గత నెల 30న భార్య, కుమారుడితో కలిసి శ్రీశైలం వెళ్లాడు. మూడు రోజుల వరకు అక్కడే ఉన్న శ్రీధర్ రెడ్డి తల్లితో ఫోన్​లో మాట్లాడాడు. తర్వాత ఫోన్ కలవకపోవడం వల్ల తల్లిదండ్రులు ఆందోళనకు గురయ్యారు. తిరిగి ఈ నెల 5న రాత్రి తల్లితో ఫోన్​లో మాట్లాడాడు. ఛార్జింగ్​లేదని... శ్రీశైలంలోనే ఉన్నట్లు చెప్పాడు. తర్వాత ఎన్నిసార్లు ప్రయత్నించినా అందుబాటులో లేకపోవడం వల్ల ఈనెల 16న హయత్​నగర్​ ఠాణాలో ఫిర్యాదు చేశారు.

అదృశ్యం కేసుగా నమోదు చేసుకున్న పోలీసులు దర్యాప్తు చేపట్టారు. శ్రీధర్ రెడ్డి ఓ ప్రైవేటు బ్యాంకు ఉద్యోగి కాగా... అతడి భార్య ప్రైవేటు ఆస్పత్రిలో పనిచేస్తుంది. వీరికి 15నెలల బాబు ఉన్నాడు. శ్రీధర్ రెడ్డి వాస్తవంగా శ్రీశైలంలోనే ఉన్నాడా?, మరే ఇతర కారణాలు ఏమైనా ఉన్నాయా అనే కోణంలో పోలీసులు దర్యాప్తు చేపట్టారు.

ఇదీ చూడండి: పోలీస్ ఉద్యోగం వచ్చింది..మృత్యువు వెంటాడింది..